Opposition-ah BJP awm dawn

Sorkar tharah BJP chu opposition party an ni
dawn; inthlan hmain BJP hi BJP telna sorkar a ding dawn tiin campaign mah se sorkarah an tel dawn lo.
“Opposition lamah kan awm ang, sorkara tel tumna a awm lo a, chutiang ngaihtuahna a awm lo,” BJP president Vanlalhmuaka chuan a ti a, an MLA pahnihte pawh Assembly House-ah opposition bench-ah an thu dawn tih a sawi.
Tute pawh sorkar dawn se BJP an tel ti te, BJP telna sorkar a ding ang ti tein an campaign a, Delhi atanga campaign-a Mizorama kal minister-te pawhin chutiang lam chu an sawi. Hei hi party mala sorkar thei an awm loh chuan tih thu a ni tiin Hmuaka chuan a sawifiah.
Party mala sorkar thei an awm lo thei tih ngaihdan a lian a, sorkar intawm a pian a rinawmna lai kha a awm a, chuvangin sorkar intawmah BJP an tel ang tiin an campaign tiin a sawi.
“Party dang nena inbiak lawkna a awm lo a, inthlan hmain emaw a hnuah emaw tute nen mah inbiak a awm lo,” a ti.
Inthlana chak ZPM chu mahnia sorkarna siam thei an ni tih a sawi a, party dang nena thawh dun an mamawh lo a, chuvangin ZPM nena sorkar siam dun ngaihna a awm lo tih a sawi.
BJP hi bial hnihah an chak a, term liam meka MLA pakhat neite khan tunah chuan MLA pahnih an nei dawn. Bial hniha an chak hi an lawm a, che tha an inti.
“MLA pahnih kan nei a, MADC-ah kan sorkar bawk a, hma kan sawn a, kan hmasawnna hi a chak a, kan lawm khawp mai,” a ti a, “Delhi lama kan party hruaitute pawhin che tha min ti,” a ti bawk.
MLA hi pahnih neih tlin an beisei sa a, a tlem berah pahnih neih, panga nei tling thei tih chu an beisei dan a nih thu sawiin, Delhi-a an hruaitute pawhin MLA neih hrim hrim an duh a, pahnih an nei chu an lawm tiin a sawi.