Season thara Messi beiseitu Lewandowski

Season thara Messi beiseitu Lewandowski
Tlarhma lama Barcelona in-nghahna lian ni mek Polish forward Robert Lewandowski chuan season thara Lionel Messi nen an khelhdun ngei a beisei thu Thawhlehni khan a sawichhuak.
Barca striker Lewandowski hian kumin nipui thawt insuan hun laiin Argentina great hi Paris Saint-Germain atangin Catalan club-ah kirleh se a duh ngawih ngawih a, chumi chungchang chu sawiin, “Messi hi Barcelona ta a ni a, a lokir leh a nih ngat chuan a makin a ropui dawn em mai.
“Hetah hian hmun a la nei reng tih kan hre vek, Barcelona-ah hian. Eng thil chiah nge lo thleng dawn tih chu ka hre mai bik hauh lo a, mahse, season tharah hi chuan kan khelhho ngei ka beisei tlat a ni,” a ti.
Kum 2021-a Ligue 1 giants-in Messi an lakchhuah chhan kha Champions League trophy an duh vang nia ngaih ni mah se kum 35 mi ho hian tun thlengin an it ber hi an la sualchhuak zo tlat lo a, kumin June thla hi PSG-a a contract tawp hun a lo ni tawh bawk nen, tunhnaia an chak loh tumin PSG supporter rualte’n an auel lehzel a, kumin nipui lai hian Argentine World Cup winner hian Paris a chhuahsan mai rinna a lian chho zel a, he boruakah hian Lewandowski chuan season thara an khelhdun ngei a beisei thu a sawichhuak ta a ni.
Argentine playmaker Messi hian Barcelona tan game 778-ah goal 672 thun tlingin, Nou Camp club tana goal khung hnem ber a ni mek a; an club inzirna hmunpui La Masia youth academy atanga zirchhuak niin, kum 13 mi lek ni chungin Barcelona a zawm a, PSG lama a kal thleng khan Catalan team tan hian trophy 35 a lakpui hman.
Barcelona 0-0 Girona
Spanish La Liga hmahruaitu team hi Pathianni zan khan an kawtkaiah chak zo loin an mikhual Girona lakah point hnih an hloh a, heti chung hian leagueah point 13-in anmahni hnaihbertu leh an hmelma kumhlun Real Madrid nen an la inthlau a, champion turin bei-seina an neih belh zel.
Nou Camp inkhelah khan Xavi tam tan Robert Lewandowski chuan a goal thun theihna hun remchang bawhpelhin, La Liga table-a point 15 zeta sang fal thei tur khan point khat bak an thawkchhuak zo lo.
He inkhela Lewan-dowski ‘golden chance’ hmuh hi tan atanga minute lina leka thleng niin, a ball thawnluh chuan Girona goal kham chung a fuh a; Fulham atanga loan-a an hawh Girona keeper Paulo Gazzaniga chuan ‘save’ tha tak tak nei mawlh mawlhin, chu’ng zingah chuan Raphinha goal tur a tel nghe nghe.
Taty Castellanos chu Girona tana goal thun theihna hun remchang hmu langsar niin, goal ban sirah a chhuih chhuak.
Tun kha season kal laia an khelmuala Barcelona-in point an hloh then vawithumna ni mah se Pathianni khan an elpui lian ber Real Madrid chu Villarreal lakah an tlawm a, Catalan team hian an hmahruaina an sawhnghet thei hlek tho.