Organic farming atana hriat tur hrilh

Mizoram University leh ICAR National Bureau of Agriculture Important Microorganism (ICAR-NBAIM) tangdun chuan sumdawng leh loneitute hnenah organic farming lama hma la tura themthiamna an mamawhte hrilhin MZU campus-ah programme an buatsaih.
He programme hi hmarchhak state tlangrama chengte tan bik deuha ruahman a ni a. MZU vice chancellor Prof. DC Deka chuan hawngin, MZU registrar Prof. Lalnundanga, TB Citronella Oil Industry & TB Vermicompost Industry Assam CEO Churamoni Sarmah, Tanhril Local Council chairman Simon Lalfakawma te chu khualzahawm an ni.
Ni hnih chhung neiin mithiam leh thusawi tura sawmte nen lo neih dan leh a kaihhnawih chi hrang hrang zirho a ni a. Jhum cultivation-in a lei a tih chhiat dan leh lei vawnthat dan tur inhrilh a ni. Agriculture deputy director Lalhmingmuana, MZU Department of Management ami Dr Carolyn Vanlalhriati, PU College Department of Biotechnology ami Dr. Zothanpuia, Hrangturzo Farmers Producer Company CEO Lalchhuanawmi te chu mithiam sawmte an ni.
A kharna inkhawmah MZU finance officer Prof. Vanlalchhawna chu khuallian niin, university mithiamte leh loneitute tan ho pawimawh zia a sawi. Programme chhimtu loneitute hnenah hnathawh bungrua chi hrang hrang an sem bawk.