Osaka hmachhawn tura chak Swiatek

French Open inbuatsaihna kal mekah Italian Open khelh mek niin, Pathianni khan Iga Swiatek chuan Elisabetta Cocciaretto laka game khat chauh hloh chungin 6-1 6-0 hnehna nen third round a paltlang a, fourth round lamah Naomi Osaka nen an inhmachhawn ang.
Kum 2021 leh 2022-a Italian Open title lo hawn ve tawh Poland nula Swiatek hi a tlakrualpuite zinga clay-court player tha bera ngaih niin, Grand Slam title paruk a sualchhuah tawh zinga pali chu French Open trophy a ni.
Heti hi ni mah se kum 2024-a Roland Garros-a hnehna tluantling a chan hnu khan world number three hian clay title a la leh ngai ta lo tlat a; nikum Wimbledon-a champion-puitu coach Wim Fissette nena an inthen hnuah great Rafael Nadal-a coah hlui Francisco Roig nena an thawhdun hnuah Italian Open hi clay leilunga a hlawhtlin lehna hmasaber a ni thei dawn em kan thlir zel ang.
Kum 24-a upa Pole hian tualchhung nula tan hlawh laka hnehna nuamsa chang turin minute 67 chiah hun a mamawh a; a tum leh tur Japanese four-time Grand Slam champion Osaka erawh a deh a khirh deuh mai thei!
Osaka hi Madrid Open khelh zawh takah khan set thum inbeihnaah world number one Aryna Sabalenka hneh loin a tlawm a, Rome khaw tournament round thumnaah erawh 6-1 6-2-in 19th seed Diana Shnaider a sawp thung.
Kum 28 mi Osaka hian 2024 French Open second round-ah khan Swiatek hi a hneh teuh hle a, match point-ah Pole a insiamtha a, a chak zui ta a ni.
Inrinnia Sabalenka tlak hnua Italian Open women’s draw lama ranking nei sang ber ni chho ta world number two Elena Rybakina pawhin third round inkhel dangah 6-4 6-3-in Alexandra Eala a hneh a; fifth seed Jessica Pegula chuan Swiss qualifier Rebeka Masarova, lakah darkar khat lek chhungin 6-0 6-0 hnehna awlsam a sualchhuak ve bawk.