Ozzy hla a lar thar- a vawi khat nan ‘Crazy Train’ Hot 100-ah a lang

Ozzy hla a lar thar- a vawi khat nan ‘Crazy Train’ Hot 100-ah a lang
Kum 76 mi ni a July ni 22-a chatuan ram pan ta, Ozzy Osbourne chu a thih hnuah a hla a lar thar leh ta hle a, a hla zinga kan hriat lar tak, mahse, a vanglai pawha US singles chart, Billboard Hot 100 a lang thei miah lo ‘Crazy Train’ chu a vawi khat nan he chart-ah hian a rawn lang ve ta hlawl mai a, “Mama, I’m Coming Home’ pawh kum 33 hnuah chart-ah a rawn lang thar ve leh ta bawk.
‘Crazy Train’ hi Ozzy thih hnuah kar khat chhungin streaming 194%-in a pung a, US-ah kar khat chhungin stream maktaduai 9.2 tlingin, radio airplay pawh 108%-a pungin, maktaduai 2.4 a kai a, download sales phei chu 1,184%-a pungin, 11,000 a kai thei a, Billboard Hot 100 (US singles chart)-ah No.46 a rawn kai a, he chart-a a lan vawi khatna a ni.
“Mama, I’m Coming Home” pawh stream 298% a pungin, maktaduai 8.7 a kai a, radio airplay 143%-a pungin, maktaduai 2.1 a tling a, sales 899% a pungin, download sales 15,000 a tling thei a, chart No.49 a rawn kai ve leh ta bawk.
‘Crazy Train’ hla hi Ozzy solo album hmasa ber, 1980 a a tlangzarh “Blizzard of Ozz’ a hla kha niin, a signature song an tih zinga mi a ni zui ta a, July 1981 khan Billboard Mainstream Rock Airplay chart-ah chuan No.9 a kai a, mahse, all-genre chart, US-a hla lar dan tehna Billboard Hot 100 chart-ah erawh tun hi a vawi khat lanna a ni thung.
‘Mama, I’m Coming Home” hi Ozzy solo album parukna ‘No More Tears’ atanga a single niin, April 1992 khan Billboard Hot 100-ah No.28 a lo kai tawh a, Mainstream Rock Airplay chart-ah No.2 a kai thei bawk.