Pa 3-na inchuh tur England leh France
World Cup 2026 a pathumna ni tur chinfel a ni dawn a, France leh England te naktuk zing dar 2:30 khian Hard Rock Stadium-ah England leh France an inhmachhawn dawn. Third place play-off hian pawimawhna tak a nei a, Golden Boot dawng tur tihchianga inkhel ni thei dinhmunah a ding.
France an tawlhhnung zel
Didier Deschamps enkawl France hi World Cup-ah an khel tha thei viau. World Cup 2018-ah an champion a, kum 19 mi Kylian Mbappe chu rawlthar tha berah thlan a ni. WC 2022-ah final an lut zui leh a, World Cup final hmuhnawm bera ngaihah Argentina lakah vanduaiin an champion zawn thei lo. Champion zo lo mah se Kylian Mbappe chuan goal 8 a thun a, Golden Boot a dawng. 2022-ah player tha tak tak nen an inlan a, semi-final a lut. World Cup-ah a zawna vawi thum semi-final lut thei pathumna an ni a, Brazil leh Germany hnung an zui. An khelh that chhoh em vangin champion turin rin an kai hle. Rinkai viau mah se Spain an khan lo ta viau thung a, final an lut zo lo. World Cup ngam viau mah se an hnungtawlh hret hret zel.
England an hmachhawn tur hi France head coach Didier Deschamps hun hnuhnung a ni dawn a, World Cup zawh rualin a hna a bansan zui nghal dawn. France captain hlui leh coach ropui ni zui Deschamps thlah nan France hian England hneh an tum ngei ang.
England in chak an tum
World Cup 1966-ah an champion hnua final lut leh ta miah lo England in pathumna nih ngei an tum dawn. Third place play-off a an khingpui France an hneh a nih chuan kum 1966 hnu lama an thlen san ber tum a ni dawn. 1990 leh 2018-ahte semi-final lut bawk mah se final an lut zo lova, pathumna an ni phak lo ve ve bawk.Heti a nih vang hian France hneha pathumna nih hi an tan hmasawnna leh thil thlakhlelhawm a tling.
Head to head
England leh France te hi inelna hrang hrangah vawi 32 ngawt an inhmachhawn a, vawi 17 chakin England an chungnung zawk. France in vawi 10 hnehna an chan tawh laiin vawi 5 dang an inhnehtawk. World Cup-ah bik hian vawi 3 an inhmachhawn tawh a, England in vawi 2 hnehna changin France vawi khat an chak tawh bawk. 2022 quarter-final-ah an intum a, 2-1 in France an chak.
Golden Boot inchuhna
Final lut zo lo, pathumna inchuhna a nih vangin an that dan ang berin team hnihte an inlan ngai tawh chiah lo thin a. An player thate pawhin hah taka khelh aiin awl an thlang zawk fova, player naupang leh hmun chang tlem zawkte hun an pe thin. England leh France inkhel tur erawh hi chu Golden Boot dawngtu tur tihchiang theitu tur inkhel a nih vangin France captain Kylian Mbappe a inlan ngei a rinawm thung.
Mbappe hian goal 8 thunin assist vawi hnih a nei a. Messi nen an goal thun zat a intluk mek. England lakah goal a thun a nih chuan a zawna Golden boot dawnna hun remchang a nei. Messi lehpelh ngei tumin tan a khawh ang.