Pacquiao rematch kan thlir hmaa Mayweather hmaa ding tur kickboxer

Pacquiao rematch kan thlir hmaa
Mayweather hmaa ding tur kickboxer
Tarlan tawh angin, kumin September ni 19, Inrinni khian kum 49-a upa Floyd Mayweather leh kum 47 mi Manny Pacquiao-te chu Sphere, Las Vegas-ah a tum hnihna atan an inhmachhawn leh dawn a, Netflix lamin live-in an tichhuak dawn a, chu mi hmain American mihang fighter zawk hian kumin June thla exhibition bout-ah veteran Greek kickboxer Mike Zambidis a hnek phawt dawn.
Boxer ropuite hian professional boxing an chawlhsan hnuah sum siamna atan te, an lunglen vangte pawh a ni thei bawk ang a, hruihruala kirleh an intihhmuh nasa hle a, Mayweather ngei pawh hi professional fight a chawlhsan hnu khan exhibition bout vawi riat ngawtah a inlan leh hman tawh a, kickboxer nena an inhnek tur pawh hi chuti ang huanga mi chu niin, suamtuakna ang bawk a nih hmel!
Kum 2015 daih tawha Pacquiao leh Mayweather intawng kha ‘Fight of the Century’ tih niin, an vanglai chuai tak tak hmaa inhmachhawn an ni bawk a, Las Vegas bout kha boxing history-a sum tamna ber a ni chiang hle a; kumin favang theng thawt laia an intawng leh tur pawh hi uaithla lam ve ve ni tawh mah se khawvelin a nghakhlel nghal a, sum lengvak pawh a tlem leh miah lo ang!
Five-weight champion hlui Mayweather hian chawlhkar li lek liamta mai khan a tum lina atan boxing-a a kirleh thu a puang a, kum kaw chhunga professional boxing match a hmachhawn hmasakber tur atana inbuatsaihna pakhat atan Athens khawpuiah Zambidis a infiampui dawn a ni.
American Mayweather hian Instagram lamah tunlaia a boruak tawn mek sawiin, “Kum 2026 hi ka tan kum duhawm leh phurawm tak a ni a, fans tihphurna kawng ka zawh leh mek a ni.
“Athens, Greece, lo inring r’u aw. Tun nipui thawt lai hian legendary battle in hmuh dawn kha,” a ti.
Kum 45 mi Zambidis hian kickboxing record 157-24 a neih tawha tum 157 a chak zinga vawi 87 zet hi knock out hmanga a chak niin, a official fight hnuhnungber chu June 2015 daih tawh ve bawk kha a ni.
Mayweather hian kum 2017-a mixed martial arts fighter Conor McGregor laka 10th-round technical knockout hnehna a chan hnu khan tun thlengin pro bout a la hmachhawn leh ta lo.