Pakistan-a inbeihna thlengah civil mi leh sipai tam tak thi
Pakistan chhimthlang lam, Balochistan province-a silai leh bomb hmanga mi beihna nasa tak thlengah civil mi 18 leh venhim hna thawktu 15 an thi tih an ram sipaiten an sawi.
Venhim hna thawktute hian tharuma an chhan letnaah a beitu mi 92 vel an that ve bawk niin sipai hian an sawi a. Balochistan Liberation Army (BLA) hel pawl chuan an tih niin a hmain an lo sawi tawh a, sipai eng emaw zat an that niin an insawi.
An rama province hnufual bera tharum thawhna thleng rapthlak ber a ni a, Pakistani sorkar hi he province-ah hian hnam bil hel pawl nen kum tam tak an lo inbei tawh.
Pakistan chuan BLA hi India-in an pui niin a sawi thin a, Delhi chuan a pha nasa hle.
Sipaite chuan province khawpui, Quetta leh a chhehvela hmun eng emaw zatah civil mite bitumin helho hi an che niin an sawi.
Khawpui leh khaw 12-ah grenade leh silai a puak a, police leh paramilitary awmna hmun bakah lung in leh sorkar building te beih an ni nasa zual.
Quetta-a sorkar hmun leh a bul hnai kawngte chu Inrinni ni leng khan khar a ni a. Mobile phone service pawh a chhiat phah hle a, rel tlan pawh tihtawp lailawk a ni.
Prime Minister Shehbaz Sharif-a chuan sipaite chetna a fak a, ‘firfiaka chetna beihna hi nuai chimih vek a nih hma chuan kalpui zel a ni dawn’ tih a sawi.
BLA hian Pakistan-a ram leilung hausa ber province hi sorkar laipuiin tual chhung miten an hlawkpui theih miah lova hmangah an puh a. Tual chhunga mihring dikna chanvo humhalhtute chuan venhim hna thawktute chu mi an bo thinah mawhphurtu niin an puh bawk a, Islamabad chuan a pha thung.
Balochistan province hi Pakistan ram pum 44% dawna zau niin Iran leh Afghanistan nen an inri bakah Arabian Sea tuipui kam awmna a ni a. An rama mihring maktaduai 240 vel zinga 5% chuang awrh chauh an cheng thung.
Balochistan hi Pakistani province zingah chuan ram leilung hausa ber niin boruakalhthei leh laih chhuah chi thil hlu an ngah hle.
An ram bial chhunga cheng tam ber, Baloch hnam hming chawia province hming hi phuah a ni a. Pakistani sorkar do leh Baloch mite tana ram hran neih tuma beitu hel pawl hian kum 1948-a British Indian Empire atanga Pakistan a indan atangin an bei tawh.