PAMRA hnenah puihna hlan

PAMRA hnenah puihna hlan
Kumin March 17 zinga Assembly House bul Treasury Bazar-a kangmei chhuakah PAMRA office a kangral vek a. Ningani khan Assembly Session chawlh lailawk laiin chief minister Lalduhoma leh Disaster Management & Rehabilitation minister K Sapdanga ten PAMRA hruaitute hnenah tanpuina sum an hlan.
Chief minister hian CM Relief Fund atangin cheng nuai khat leh DM&R minister-in Disaster Fund atangin cheng nuai 5 an hlan a. Inhlanna hi adviser to CM Lalmuanpuia Punte, MNF returnees MLA nilai pahnih – VL Zaithanzama leh Lalrintluanga Sailo ten an telpui
Kangmei avanga an office leh bungrua leh lehkha pawimawh chantu Peace Accord MNF Returnees Association (PAMRA) chuan chhiat an tawhnaa sawrkar hotute atanga puihna an dawn avangin an lawm hle tih an sawi.
PAMRA Gen. Hqrs. thuchhuak chuan, March 19-a Assembly Session-ah Dampa bialtu MLA Pu Lalrintluanga Sailo in kangmei avanga chhiat an tawh chungchang House-a a sawichhuah thu kal zelah, House leader, chief minister Pu Lalduhoma’n CMRF atangin Rs. 1,00,000 a pek thu leh DM&R minister Pu K.Sapdanga’n Rs 5,00,000 a pe chu an lawm hle tih a sawi.
‘Mizoram rorelna sang berah kan chhiat tawh chungchang sawichhuah a ni a, sawrkarin tanpuina min pek thu House leader-in a puang hi lawmawm kan ti a. Hei mai ni loin, PAMRA hi ram tana nunna thapa beitute an ni a, pung leh chuang tur awm lo an ni a, Maumuala an in hmun pawh chingfel turin Revenue minister Pu B Lalchhanzova nen chak takin hma an la, tia chief minister-in a puang hi a hlu kan tiin, Mizoram sawrkar chungah lawmthu kan sawi a ni,’ thuchhuah chuan a ti.