Parliamentary panel-in khauh duh

Parliamentary panel chuan eitur leh in tur lam tihmelhemtute chu thlaruk lung in tang tur leh a tlem berah Rs 25,000 chawitir an nih theih nan rawtna a siam.
Adulterated food ei leh in avanga hriselnain a tawrh viau theih avangin tuna chung ti Thin te laka hremna chu a tawk tawh lo tiin Parliamentary Standing Committee on Home Affairs, BJP MP Brijlal kaihhruai chuan a sawi a.
“Committee chuan hremna a tlem berah thlaruk lung in tan bakah Rs 25,000 chawitir nise tiin rawtna a siam a ni,” tiin tarlan a ni a.
Eitur pawlh dal leh tihkhawloh tawh hralh chuan mipui nawlpui tan harsatna nasa tak a siam theih avangin heng thila hremna lekkawh tur awmsa te chu a tawk tawh lo an ti bawk a.
“Heng mite hremna hi a tlem berah thlaruk lung in tan bakah Rs 10,000 chawitir ni se a ti a ni” tiin tarlan a ni bawk.
Tun dinhmunah chuan food adulteration-a hremna chu thla ruk thlenga lung in tan pawhsei mai bakah Rs 1,000 chawitir theih an ni a.
Committee chuan Bharat Nyay Sanhita (BNS) hnuaiah hremna kalpui tur zinga ‘community service’ telh chu thil lawmawm tak a ni an ti bawk a.
Mahse community service chu sawifiah a la awm lo tia sawiin committee chuan community service tihah chuan hlawh nei lova hnathawh a kawk ti bawkin hei vang hian fiah chiang taka community service tih chu sawifiahna siam ni se a ti bawk.
Bharatiya Nagarik Suraksha Sanhita (BNSS-2023) Bill chu Lok Sabha-ah August 11 khan Bharatiya Nyaya Sanhita (BNS-2023) leh Bharatiya Sakshya Adhiniyam (BSA-2023) Bills te nen pharh a ni a.
Heng bill pathumte hi Code of Criminal Procedure Act, 1898, Indian Penal Code, 1860, leh Indian Evidence Act, 1872 te thlakna tura tih a ni a.
Parliamentary panel report hi kar kalta Zirtawpni khan Rajya Sabha-ah thehluh a ni bawk.