Party lakah show cause notice ka pe lo – ZPM treasurer

Chhan hrang hrang avanga ZPM party laka ‘show cause notice’ pe nia sawi ZPM treasurer C Laltanpuia chuan ‘notice’ hi a pe loa, ngenna a siam mai zawk tih a sawi.
Kumin MLA inthlan atan ZPM party tana bial vil tur ruattu Nomination Committee-ah an party dan bu-in a sawi ang niloa a tel ve loh chhan leh, bial vil tura ruat tel a nih ve loh chungchangah zawhna a siam nia thu thehdarh chu a dikhlel deuh tih The Aizawl Post-in a biakpawhnaah C Laltanpuia hian a sawi a. Thil zawng zawng sawi a rem loa, lo nghah rih mai chu a tih theih a ni tih a sawi.
Nomination Committee-ah hian telh thar a ni leh tawh nia zawhna chhangin, PAC (Political Affairs Committee) in an party tana bial vil tur chu ennawn leh nise, an tih angin, ennawn leh a ni dawn tih a sawi.
MLA candidate nih hrim hrim chu a chak viau hran loa, a tul ang zawk leh ramin a mamawh anga inpe mai a ni tih sawiin, “A thlan dan system zawk hi dik se ka duh ber zawk chu a ni,” a ti. Aizawl East-I bial beisei chungchang chu thutlukna siam a la nih loh avangin, an la enzui chho zel dawn tih a sawi.
Candidate chang lo ta se, engtin nge a awm zel dawn, tih zawhna chu, “A tlachawpin kan la ngaihtuah zel ang,” C Laltanpuia hian a ti.