Sawi ang tihlawhtling lo ah MPCC-in CM leh sawrkar puh

MNF leh chief minister chu an sawrkar hmaa an sawi tawh angte tihlawhtling lo zelah Congress party chuan an puh.
MPCC Media department hotute sawi danin, 2018 MLA inthlan dawnah MNF-in an president thusawi thiam tak Pu Zoramthanga hoa mipui hnena thutiam hrang hrang an neih chu an tihhlawhtlin ringin mipuiin an kutah thuneihna kan pe a. 2018 December 15-a MNF sawrkar a pian atangin kum 5-na an hmang mek a, budget tum 5 an pharh tawh tih an sawi.
MNF thutiam zinga langsar zual kum 5 chhunga an tihhlawhtlin theih loh zingah, MNF president Pu Zoramthanga’n sawrkarna an chan chuan Vai buhfai kan rin tawh loh tur thu leh Mizo buh kan rin zawk tawh tur thu 2018 August 20 khan Mizo Hnam Runah a sawi a. Vawiin thlengin Mizoram mipuiin Vai buh la ringin, sawrkar pawhin ration atan Vai buhfai a la supply ta zel tih a sawi.
2018 October 17 Aizawl East-II MNF Workers’ Meet-ah Pu Zoramthanga hian Aizawl khawpui chu motor parking-a harsatna awm lo, traffic jam awm lohna state capital awmchhunah an siam dawn tih a sawi a. Kum 5 a liam dawn tawh hnuah pawh ninawm khawpin nileng deuhthaw in traffic a la jam tih an sawi. “Nuai sang chuang an senral tawhna PAHOSS lah chu sawrkar tan hmuh let tur a awm miah lo,” MPCC Media deptt. chairman Dr Lallianchhunga chuan a ti.
2018 inthlan dawna inthlanpui thlirlawkna interview Zonet-in a neihah Pu Zoramthanga chuan kawng chhawng siam tum thu a sawi a. 2013 June 6 Aizawl South-II MNF Block Conference a hmanpuinaah MNF president hian kawng chhawng siam an ngaihpawimawh thu a lo sawi tawh bawk a. Kulikawn atanga Chanmari inkar chu an target hmasa tur a nih thu leh hemi atan hian sum lak chhuahna tur Central Plan fund a tam zia thu an sawi a. An sawrkar tawpna kumah kawng chhawng siamna tur detailed project report pawh an la siam lo tih an sawi.
MNF-in SEDP-ah mipui cheng nuai 3 pek an tiam a, NLUP dawng tawh zawng zawng pawhin an dawng vek ang, tiin Pu Zoramthanga hian a sawichiang a. He inzawrhna avang hian thlantlin an ni tih sawiin, heti chung hian kum 5 chhungin chhungkaw 60000 tan Rs. 50000 chauh an ruahman a, chu pawh tum hnih – Rs. 25000 ve ve in an pe thei tawk tih an sawi.
“MNF hian inthlan dawna a thutiam kha a tihlawhtling thei dawn lo tih a chiang tawh a. An sawrkar chhung zawngin zeldin thu leh insawi hlim chawpin hun an hmang tluan a ni. Mipui tana hamthatna leh hmasawnna awm si loin an duhsak zawngte nen rem leh rem lo pawh thlu loin an chawm a, an hawp bawk a. Hetianga ram mipui an zah lohna leh an pawisak loh zia thlir hian Mizoramin anmahni avanga harsatna kan tawh zel lohna tur leh kan ram, kan hnam, kan sakhua a him zelna’n central-a BJP sawrkar thawhpuitu MNF sawrkar hi hnawl turin mipui kan sawm a ni,” Dr Lallianchhunga hian a ti.