Pawikhawihnaa a tuartute zangnadawmna dilna ngaihtuah

Lunglei Judicial District-a district & session judge Vanlalenmawia hoin Lawngtlaiah thubuai ngaihtuah lai jail tang ‘under trial prisoner’ chungchang leh pawikhawihnaa a tuartute hnena zangnadawmna pek thin ‘The Mizoram Victims of Crime Compensation (Amendment) Scheme 2016’ hnuaia dilna lutte ngaihtuah ho a ni.
District & session judge chuan mahni mihring pui leh khawtlang tana hnawksak leh harstana siam, dan bawhchhetute chuan an phu ang tawk hremna an hmuh ngei theih nan dan an bawhchhia a ni tih finfiahna felfai tak neih a pawimawh tih a sawi a. Hemi tur hian heng kaihhnawiha thawktu department, tlawmngai pawl leh khawtlang hruaitute inkarah thawhhona tha a awm a pawimawh tih a sawi. Thahnemngaih luat avanga mimal leh pawl anga dan bawhchhetute dap leh man chhuah kawngah dan hnuaia kan tih theih chin leh tih loh tur chin hriat a pawimawh thu leh sawrkar hnuaia thuneitute hmalakna ngaihchan thin a tul thu a sawi bawk.
Thutkhawmah hian court-in an chungthu a ngaihtuah mek (under trial prisoner) jail tang mi 7 chungchang sawi ho a ni a. ‘Victims of Crime Compensation Scheme’ hnuaia zangnadawmna dawng tura dilna lut 7 ngaihtuah a ni. Heng dilna 7 atanga 4 chu ngaihtuah that leh tura tih niin, 2 chu pawmsak an ni a, 1 chu hnawl a ni.
Lawngtlai District Jail-a awm mekte inenkawlna kalpui dan, hriselna dinhmun leh ei leh in pek an nih dan report a ni a, February chhung hian Mental Health Camp neih hman tum a ni tih sawi a ni.