Pawl lian pathumin kawngpui vei

Mizorama tlawmngai pawl lian pathum – Central YMA, Central Young Lai Association leh Mara Thyutlia Py General Hqrs. aiawhte chu tunhnai khan Lungleiah an inhmukhawm a. Myanmar leh Bangladesh atanga râltlan chungchâng bakah, Mizorama inkalpawhna kawngpui siam tha tawk lo, a bîkin chhim lam tlângdunga kawngpuite, tha zawka siam a nih theih nan hma lak ho an rel a.
Mizoramah hian eng vanga state highway leh national highway-te hi tha rei ve thei lo nge a nih tih hi zawhna lian tak a ni reng a. Kawngpui siam chungchangah Mizoram PWD leh Central YMA chuan thawhdunna thuthlungte pawh an lo siam tawh thin a, mahse tun thleng hian ‘kawngpui chhia’ tih thawm hi hriat tur a la awm zui zel a; tunah phei chuan pawl lian tak tak pathumin Mizorama kawngpui siamte tun aia tha zawka siam a nih theih nan hma lak ho an rel leh ta rup mai a ni a.
State dangah pawh ruah a sur ve thin tho a, ruahsur hi chuti lutukin chhuanlamah an siam ve vak lo niin a lang. State thenkhat, a bikin northeast state zingah, kawngpui chhe ve tak tak a lo awm a nih pawhin, ‘anni kawngpui pawh a tha bik lo’ tizawnga tankhawh tur kan ni lo. India ram chhung state tam zawkah ruahsur laia kawngpui an siamte kum tam tak tak repair ngai lovin tha takin a awm thei tih kan hmu a. Mizoram a nih avanga kawngpui siam dan a danglam bikna tur a awm lo va, eng vanga chhe bik em em thin nge a nih tih hi zawhna pawimawh tak a ni.
A chhanna awm thei chu, kawngpui siam a nih laiin estimate angin siam a ni thin lo; lung a chang tha tawk lo; kawngpui chhuat inthuahthip dan tur a dik tawk lo; tuiluankawr a nih dan tur angin siam a ni lo.
Kawngpui chhiat chhan hrang hrangte hi kawngpui siam a nih laiin thuneituten an vil tha lo tihna a ni thei a, hnathawh vil that a nih loh chuan eirukna kawng a inhawng zau bawk.
Pawl lian pathumte hian kawngpui siamte tun aia tha zawka siam a nih theih nan tanho an tum hi thil tha tak a ni a, hma an lak dan tur chipchiarin hriat ni lo mah se, tuna kan sawi tak, kawngpui chhiat chhan hrang hrangte hi uluk taka an vilpui theih a ngai dawn tihna a ni a, chutiang puitlin thei tur chuan kawng thui tak zawh a ngai dawn a, pawl lian pathumte hian an tum tak tak chuan an ti thei turah a ngaih theih a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More