Tuirial Hydel Project siamna tur ram lak leh zangnadawmna pek danah ram lem siam document lem siama puh mi paruk chu court-in thiam loh a chantir a, he thila inhnamhnawiha puh sawrkar hnathawk zingah an thiam lo tih finfiahna tur hmuh a ni lo thung. Thiam loh chantir tak te hi court thu angin Central Jail-ah dah nghal an ni a, vawiin – February 8 hian hrem an nih dan tur a puang ang.
-- Advertisement --
Prevention of Corruption Act Special Judge court chuan hemi chungchanga thutlukna hi 2023 February 7 khan a puang a. Ram neitua inchhal, tuna thiam loh chantir takte hi – C Vanlalchhuana s/o Darphunga (L) Electric Veng Aizawl; Saiaithanga s/o Chhantuahlala, Tuithiang Aizawl; C Rokhumi d/o Chawnghuliana (L), Durtlang Aizawl; Lalduhawma s/o Lalhungliana, Durtlang Leitan; K Lalrawna s/o Thangluaia (L), Champhai Bethel leh PC Lalthazovi d/o Rodailova, Durtlang Leitan te an ni a. Heng mite hi VC ram pass-a Saipum VCP hminga diklo taka hming sign-a puh an ni a. He thila sawrkar office puh tel H Lianzela, MCS chu dan dikloa thiltihnaa a inhnamhnawih ve na he case chhuituten an finfiah theih loh avangin a fihlim.
Special Judge Dr HTC Lalrinchhana’n court rorelna a sawi danin, kum 2001 vela Tuirial Hydel Project siamna tura NEEPCO hmalaknaa ram lakna leh zangnadawmna pek thubuai hi CBI (Central Bureau of Investigation) in chhuiin, khatih laia Aizawl DC pisa-a ADC leh ASO-II hna thawk kawp H. Lianzela bakah ram neitua inchhal – C. Vanlalchhuana, Saiaithanga, C Rokhumi, Lalduhawma, K Lalrawna, PC Lalthazovi leh K. Darkunga te leh, VC ram pass-a VCP Pu Sela hminga diklo taka hming sign tu-a puh Lalrinsanga, Saipum Kolasib district te chu thubuai siamsak an ni.
Court-in thubuai a ngaihtuah chhung hian K. Darkunga s/o Chalbera (L) ITI Veng Aizawl hi a boral avangin a thubuai tihtawp a ni a. H Lianzela, MCS hi a ram enfiah (survey) a nih laia Team leader a nih angin, a taka mihring awm si lo zangnadawmna dawng tura hming chuang, zangnadawmna dawng tur mi 352 zinga VC ram pass lem 49 pawmsaktua puh a nih bakah Branch officer a nih laiin zangnadawmna sum dawngtuten an lakna, Actual Payee Receipt (APR) ah midang hminga lo dawng, mi hming sign saktu engemawzat an awm a; APR-a hming sign-tu leh a taka la dawng si lo tamtak sum chingpena puhna thubuai awrhtir a ni.
He thubuaiah hian court-ah CBI lam thuhretu mi 119 koh leh thu zawh an ni a, hemi hnu hian puh an nihna hrang hrangah thubuai neite hi insawifiah tir vek an ni. Thubuai neite lam hian thuhretu an duh angte an lamtang atan an ko vek bawk.
MCS officer H Lianzela chungthu bikah hian court chuan CBI lamin a thiamlohna an finfiah zo lo, tiin, thutlukna a siam a; zangnadawmna dawngtu mihring hmuh zawh loh anga tarlante pawhin APR-a zangnadawmna dawnnaah, dawng anga hming sign vek a ni ngei a, hemi thubuaia puh ve dangte zawk inhnamhnawihna a lo ni tih court hian a finfiah a ni.
VC ram pass lem chungthu ah pawh amah H Lianzela hi a chunga thuneituten an tirh angin thei leh thlai chauh enfiahin amah leh a hote hian hna an thawk a, VC ram pass tak a nih leh nih loh enfiah tura mawhphurhna nei a ni lo, court hian a ti.
Zangnadawmna dawnna bu APR-ah midang hminga lo dawngte chungthu ah pawh, H Lianzela chu Branch officer a nih angin a hnuaia thawkten an enfiah leh dik an tih chin a hnena an dah luh ang ang hming a lo ziahhnan mai tih court hian a finfiah bawk.
Thubuaia an puhna dang, zangnadawmna dawng tura tarlan a taka la dawng ve lo te sum chungthu ah chuan, zangnadawmna dawng turte hi an lungawi loh avangin an sum hi an lachhuak duh lo lui a, H. Lianzela hian chumi chungthu ah chuan mawhphurhna a nei zui loa, chu sum chu a ngai ngaiin DC pisa lamah a la awm ngei ang, tiin court-in thutlukna a siam a. H. Lianzela hi court chuan an puhnaah a fihlim, tiin thiam a chantir ta a ni.
VC ram pass lem 49 hi 1982 leh 1983 kumah chutihlaia Saipum VCP Sela hminga pekchhuah a ni a; thubuaia puh dangte hian tlaikhawhnua an lei leh an hminga chuang ni si a ni. He thilah hian Lalrinsanga, Saipum Kolasib district chu VCP hminga diklo taka hming lo sign-tua puh a ni a, chutihlaiin Forensic Science Laboratory report-ah Lalrinsanga specimen signature leh VC ram pass lema tarlana hming sign-tu hi thuhmuna finfiah a nih bak finfiahna dang a awm lo a, ram enfiahna (survey) hi kum 2001 vela neih a nih laiin Lalrinsanga hi kum 2003-ah chauh Saipum VCP a ni a, ram lakna (award) hi Award No.4 of 2002 daih a nih si avang leh VCP seal chuanga hming sign a nih avangin, Court chuan CBI hian court-ah finfiahna tha tawk an neiloa hmu in Lalrinsanga hi thiam a chantir bawk.
Special Judge chuan, tuna mi parukte hi inthurual tlangin VC ram pass lem siamnaa inhnamhnawihah te, VC ram pass lem hmangin zangnadawmna an dawn theihna atan sawrkara thuneitute bumah te, VC ram pass lem a dik ang taka lantira zangnadawmna dawngah te thiam loh a chantir a. Chutihlaiin, Lalrinsanga, Saipum nen inthurualin thuneihna nei siloa VC ram pass pe chhuak anga puh an nihna thubuaiah bik erawh Lalrinsanga hi a thubuai hmasaah thiam chantir a nih tawh avangin, an ni ho pawh hi fihlim nghal an ni.
“Khawtlang nunah sumpai duham luatna a hluar hle a, thawhrim rah nilo sum awlsam umna hian ram inrelbawlna leh kan ram sumpai a nghawng chhe ta hle; hlemhletna leh kuttlingloa sumpai umna in ram hmasawnna a tih thuanawp zia te, sawrkarin ram a laknaa zangnadawmna dikhlel leh tam uchuakin mipui sum a eiral nasat zia leh, hmasawnna hnathawh ti sukuktu a nih zia te, chutiang chanchin lungchhiat thlak tak chu he thubuai pawh hi a ni ve a, mipui zawng zawngin inthuruala heng hi do tlan ngai” – Prevention of Corruption Act Special Judge Dr HTC Lalrinchhana