US titi-naah sawi sual neih inhre lo CM kan chhan hneh lo – Rinliana Sailo

US titi-naah sawi sual neih inhre lo
CM kan chhan hneh lo – Rinliana Sailo
Tunhnaia USA-a inkawmhonaa a thusawiah sawi sual a neih a inhre lo tih Assembly speaker Lalrinliana Sailo chuan a sawi a. MNF chhuahsan tumna a neih loh thu sawiin, chief minister Zoramthanga chu a party angin an chhan hneh tawk lo nia a hriat thu a sawi.
USA-a zin MNF MLA Lalrinliana Sailo hian Zirtawpni khan Mizoram a rawn thleng a. Lengpui Airport-a amah kawmtu thuthar thehdarhtute zawhna chhangin, US a awm laiin biak ina an inkhawm bang, Mizo unauten inkawmkhawm an rawt angin an inkawm a, chutah chuan ram (Mizoram) tana tha tura nia a hriat ve a sawichhuak tih sawiin, “Sawisual ka nei pawhin ka hre lo,” a ti.
A sawi dik loh erawh, an nau pakhat in sak, a in sak naa a sum sen tawh zat zawta inngaiin amah (Lalrinliana Sailo) chuan a zawhna a chhannaah a lo ngai a, chu chu inhriatsual palh a awm tih a sawi thung.
MNF chhuahsan tum chu a rilru ah a awm loa, chutihrualin hruaitu corrupt zui an nei a nih chuan zui reng thu a awm lo tiin, zawhna a chhang bawk. “Kan chief minister (MNF president) Pu Zoramthanga hi, (MNF) kan luh dawnin, hruaitu tha leh zui tlakah kan ngai a; chutihrualin, ‘thiampui pa rulin chuk’ tih ang deuhin, opposition lamin mi sawichhiat sak an tum nasa em em a, party ang hian kan chhan hneh loin ka hria a, chhantu a nei lo chu ka ti loa, kan chhan zo lo hle a ni,” a ti.
CM puh hmingchhiat a nihna an sawifiah zo lo chu pawia a hriat thu Lalrinliana Sailo hian a sawi a. CM chu dik taka thawk mi, Pathian mi nia an hmuh laiin, minister zing ami Pu Robert Romawia Royte duhsak bik a, central atanga sum zu pawhchhuah sak a, amah (Zoramthanga) te nena sum siam ho anga opposition-in an chhuah chu, chutiang chuan mipuiin an ngai deuh thu em ni, tih theih a ni tih a sawi. “Kei chuan ka ring lem loa, amaherawhchu chutianga corrupt leader kan nei a nih chuan kan zui reng thu a awm lo. Amaherawhchu, a corrupt ka ring chuang loa, helai hi chu a pawi ka ti khawp a, kan CM hian chhantu a nei lo thin hian ka hria,” a ti.
USA-a an titina lo chhuah hnu ah MNF chu an tangrual thap nia a hriat thu te, party zingah mipui ngah ber an nih avanga an sawrkar leh mai tura a ngaih thu te a sawi bawk.
Assembly speaker ni lai hian zawhna dang a chhang a. BJP zawm dawn chuan Mizoram tan an tih let a tam ve hle turah a ngai tih a sawi. “BJP hi NDA angin MNF chuan kan thawhpui sa hrim hrim a, an thatna lai pawh a awm. Kohhran hian a him lo mai awm mange kan tih thin lai a awm a. Chutihrualin sawrkar kalphungah BJP khu an tha em em a ni,” a ti.
USA-a an titi honaah hian Mizoram mipui kan la tlem lutuk chu a hlauhawm tih a sawi a, hei hi Mizoram a la chhe vek dawn, ti zawnga US-a a sawina kha nia ngaih theihin a sawi a, a fiamthu thawhna niin a sawi bawk. Fiamthua thil dang a sawi leh chu, Mizoram a haw hnu ah, CM sawipui a, BJP zawm mai tur em maw ni, tia a sawi kha niin a sawi a ni. Fiamthua a sawi ni mah se, BJP chu zawm tak tak dawn chuan kan ram tan a man a tam viaua a rin thu a sawi. “CM te nen kan sawi a, thaa kan hria a nih te chuan nakumah MP inthlan dawn lamah, ram tana an inhawn lai, biak an nawm laiah te pawh kan la sawi ang chu,” tiin nui chungin zawhna a chhang.