Pele leh Maradona aia Messi dahsangtu – Ibrahimovic

Thawhtanni zanah goal hnih thun belh lehin Argentina captain Lionel Messi chu Fifa World Cup chanchina goal khung hnem ber a ni ta a; a chimchin sang lutuk hi football icon ve bawk Zlatan Ibrahimovic khan a sawi uar zual a, Argentinian superstar hi midang anpui nei lo, midangte nena khaikhin rem lo, mahnia ‘category’ nei hran ngat a nih thu sawiin, legend rual khat Pele, Diego Maradona leh Johan Cruyff-te ai pawha ropui zawk niin a sawi!
Dallas Stadium, Arlington, Texas, US-a Messi inkhel en tum khan a hmunah mipui 70,649 tehreng fuankhawmin, Argentina Group J match hnihna a ni a; Messi goal hnih tihluh hmangin defending champion-in si hnih faiin Austria an hneh a, khelh hniha point ruk hum chungin round of 32 an lut.
Messi hian a tir lamah penalty thelh mah se minute 38-ah Facundo Medina ball pek atangin Argentina hmahruaina leh World Cup chanchina a goal 17-na ni nghal a thun a, kum 2002 leh 2014 inkara goal 16 thuntu Germany striker hlui Miroslav Klose record a nihrualpui mek atangin record top scorer nihna a malkhalh ta a ni.
Second half hun pek belh minute 95-ah Argentine forward hian he match-a a goal hnihna leh World Cup-a a goal 18-na a tilut zui leh a, mellung phun thulh thei lo Liobel Messi ropuina a zual zel.
2026 competition kal laiah Argentina hian goal nga thun tling tawhin, an goal zawng zawng hi an captain tihluh vek a ni a; an group game hmasaberah khan Algeria lakah hat-trick a lo siam tawh bawk a nih kha.
He thu buatsaih lai thlengin, Argentina hian a thlengtu pahnih Mexico leh United States bakah Germany-te hnungzuiin last 32 an lut a, nimin zing an group inkhel dangah Jordan-in Algeria an hneh zawh loh avangin Argentina hian khelh khat la nei chungin Group J nihna an chang nghet ta a ni.
June ni 28, Pathianni zing dar 7:30 khian an group match hnuhnungberah Jordan an hmachhawn leh dawn a ni.
Ti chuan, football legend Zlatan Ibrahimovic-a tawngkam hriat tur a awm ta a, World Cup history-a goal thun hnem ber thar Argentinian ace chu khawvela footballer tha bera inchhal ve ve pahnih Pele leh Maradona bakah legend dang Cruyff-te ai pawha class sang zawkah a puang hmiah mai!
Kartawp lama kum 39 tling chho tur Messi hian a zawnin World Cup vawi kua khel tling mekin, Thawhtanni zana a goal hnih tihluh leh nen a zawnin World Cup match ruk chhung goal a khung mar mek a, chutih kawngah pawh World Cup-a goal khung zawn rei ber pahnih Just Fontaine (France) leh Jairzinho (Brazil)-te record ding lai a nihrualpui a, Jordan laka goal a khung leh chuan he record pawh hi a malkhalh leh ang.
Pa ri ve phawng phawng thin Ibrahimovic a insum buai peih leh ta lo a, Fox Sports hnenah, “Tunah chuan inhnialna tur a awm tawh loah ka ngai. World Cup history-a all-time top scorer i nih ngai chuan chhuan engemawzat chhung football i rapbet tihna a ni a, kum 38 kai chhoh tawh hnu thlenga rah i la chhuah zui zel a nih chuan mite hian eng dang nge an la beisei cheu ang ni?”
“Kum kha leh chen kha midangte nen kan khaikhin kual tawh a, mahse, mi ropui dangte meuh pawhin an el zawh loh a ni. Pele, (Diego) Maradona, (Johan) Cruyff, hming lam chhuah duh dang pawh i la nei mai thei, an vai hian pui tak vek an ni, mahse, Messi number khawlkhawm tawh zozai, a daihreina leh a trophy hawn tawh en hian mahni puala ‘category’ nei chu a ni,” a ti thlawt!
Ibrahimovic hian amah nen a inkhaikhin zui a, “Game hnih lekah goal nga a khung a, kei chuan World Cup vawi hnihah goal ka khung zo lo.
“Chuvangin, heti ang hmuh tur awm hian min tihlim a, a chhunzawm zel pawh ka beisei a, a birthday lah chu ni hnih lekin a dang tawh a, a pianchamte chu han lawm pah teh se. Piancham lawm ve hi a ngai, a inkhel lai kan hlimpui tam tawh em mai. Mi mak, sawi ngaihna awm lo a ni,” a ti.
Mite’n Argentina game an sawiin, team work nei tha, huhoa ral beih thiam ti thin bawk mah se Swedish star hi chuan mi special bik Lionel Messi hi Argentina mamawh a nih ban theih loh thuin a thusawi tlang a kawm.