Phaituala muaythai khel tur Mizo 9

Phaituala muaythai khel tur Mizo 9
Tun, May ni 26 atang hian Tamil Nadu khawpui Chennai-ah National Muaythai Championship 2023 khelh tan a ni dawn a, May ni 30 thleng awh tur India ram pum huapa Muaythai inelna lian berah hian Mizoram aiawhin player panga an kal ang.
Sub junior, junior leh senior UMAI National Championship hi SKR Engineering College, Nazarathpettai, Chennai chuan a thleng dawn a, India ram state hrang hrang atangin a tlem berah player 850 vel tel tura beisei a ni.
Muaythai Association of Mizoram (MAM) chuan National Championship 2023-a Mizoram aiawha tel tur thlanna hi March 28-30, 2023 chhung khan Ramhlun Indoor Stadium-ah a buatsaih a, hemi hnu hian kal tura thlante’n Alpha Gym, Bawngkawnah training an kalpui zui leh a ni.
Mizoram aiawh tur zinga thlan Lalmuanawma, Hunthar chu World championship 2023, Bangkok-a India aiawha khel tura thlan leh niin, world bronze medalist hian world championship a khelh zawhah Mizoram team training a zawm zui ve leh a ni.
National championship an khelh tur chungchangah MAM president Brian Lalnunhlima chuan, “A tam thei ang ber player tirh duh thin mah ila sum leh paiah harsatna kan neih thin avangin kan duh angin kan tir tam thei lo thin. India hmarchhak kil tawp atanga India chhim tawpa zin hi a hautak hle a, tun tumah pawh train ticket confirm kan neih theih loh avangin Mizoram atanga kal tur mi pakuate’n thlawhnain Chennai an pan a ngai dawn a ni.
“National championship-ah hian kan chetha thin viau a, team champion hialte kan nih thin avangin state dang pawhin min huphurh ve thin a, mahse, player kan intirh tlem avangin state wise inelna medal tally lamah chuan kan sang thei dawn lo a, kan player tha tak tak an remchan loh bawk avangin tun tumah hian kan inbeisei sang em em lo a, chutih laiin Lalngaihawma (Hunthar) leh George Lalmuanawma (Chawnpui)-te erawh champion ngei tura kan beisei an ni,” a ti.
Mizoram team hian naktuk, May ni 25, Ningani hian Aizawl chhuahsanin thlawhnain Chennai an pan dawn a; anni bakah hian India international referee pahnih – Liansangpuii Renthlei (Zemabawk North) leh Lalhlimpuia (Zonuam), Mizoram Police ve vete chuan he championship-a R&J turin Chennai an pan ve bawk ang.
Muaythai Association of Mizoram general secretary leh team manager ni bawk Vanlalawmpuia pawh he huna UMAI AGM awm turah Mizoram aiawha meeting turin a tel nghal dawn bawk a ni.

Mizoram team list :-

1. George Lalmuanawma, Chawnpui (-60Kg Senior)
2. Lalngaihawma, Hunthar (-51 Kg Senior)
3. Lalruathlua, Luangmual (-67kg Junior)
4. Roney Lalchhuansanga, Kolasib College Veng
(-54 kg Senior)
5. Lalrinhlua, Kolasib College Veng (-57 kg Senior)

Coach : Lalchhuanawma, Zemabawk
Manager : Vanlalawmpuia, Chanmari West
Official (R&J) : Lalhlimpuia & Liansangpuii Renthlei