Phar natna vei 10 enkawl mek

Phar natna vei 10 enkawl mek
Mizoramah phar natna (leprosy) nei enkawl mek mi 10 an awm a, la hmuhchhuah belh zel a nih rin a ni.
January 30 kha ‘World Leprosy Day’ a ni a, Aizawlah he ni denchhen hian hun hman niin, kumin thupuiah “Unite, Act, Eliminate” tih hman a ni.
Hmanpuitu National Health Mission mission director Dr Eric Zomawia chuan phar natna hi kum 2027-ah chuan India ram atanga umbo tum a ni a, hemi atana thawktu NHM hnuaia National Leprosy Eradication Programme-in theihtawp a chhuah tih a sawi. Tunhma in India ramah phar-ten endawng an hlawh nasa a, Mizoramah pawh phar veite tan a inthlahrunawm thin hle tih sawiin, “Mizoram Health department chhinchhiah danin, phar natna vei mi 1500 chuang an awm tawh a; tunhma phei chuan mi engemawzatin an thihpui thin. Phar natna enkawlna damdawi MDT hi man to tak a nih laiin, a thlawn liau liauin sawrkar in a pe a ni,” a ti.
National Leprosy Eradication Programme state leprosy officer Dr Lalawmpuia Chhangte sawi danin, Mizoram, a bikin Aizawlah phar natna vei an awm nual a, la hmuhchhuah belh zel a nih rin a ni. Tunah hian phar natna vei Aizawl district-ah 4, Lunglei district-ah 2, Lawngtlai district-ah 3 leh Kolasib district-ah 1 an awm mek. Phar natna chu hlauhawm leh tihbaiawm a ni lo, tiin, phar neia inringhlel chuan damdawi in hrang hranga skin specialist emaw Civil Hospital Aizawl-a Department of Dermatology-ah inentir turin a ngen
Civil Hospital Aizawl medocal officer in-charge Urban Leprosy Centre Dr Lalnunpari Sailo chuan phar natna hmuhchhuah dan leh enkawl zui dan powerpoint presentation hmangin a sawifiah a. The Leprosy Mission Mizoram executive secretary Rev TC Zodinsanga’n kohhran-in hma a lak dan leh Myanmar thlenga hma an lak dan a sawi a ni.
World Leprosy Day hmannaah hian Health department official-te bakah Mizoram College of Nursing final year zirlaite leh Health Worker Training Institute Kulikawna final year zirlaite an tel a ni.