Phullem 28 chuang phah tawh

Phullem 28 chuang phah tawh
Home minister Lalchamliana chuan MNF sawrkar hnuaiah UD&PA department kaltlangin phullem 8 leh Sports department kaltlangin phullem 20 chuang phah a ni tawh tih a sawi.
Urban Development & Poverty Alleviation department kaltlanga Siaha district Thosai khelmuala phullem (artificial football turf) phah tur lungphum chu Ningani khan Home minister hian a phum a. Sawrkarin thalaite hmakhua ngaiin infiamna lam hmasawnna turin theihtawp a chhuah tih sawiin, UD&PA kaltangin phullem 8 leh Sports department hnuaiah phullem 20 chuang phah a ni tawh tih a sawi.
Zu leh ruihtheihthilin Mizoram thalaite a run mek a, nunna tam tak chan a ni tawh tih sawiin, thalaite ruihhlo laka chhanchhuak turin infiamna chu thil pawimawh tak nia a hriat thu a sawi. Phullem phah tak zawhfel a nih hun chuan nunna tamtak chhanhimtu a ni thei dawn tih a sawi a ni.
“Infiamna chuan inthunun theihna a kentel tlat avangin infiammite chuan mahni taksa thunun theihna tha tak an nei thin a, chu chuan taksa hriselna leh damreina a kengtel a ni,” Lalchamliana hian a ti a. Zoram mipui chu infiamna leh taksa sawizawi kawngah tan la thar turin a ngen.
Siaha district atanga infiamna lama Mizoram tihmingthatu an lo chhuak fo chu fakawm a tih thu a sawi bawk.
Thosaia phullem phahna tur hi SEDP atangin cheng nuai 395.53 hmuh a ni a, contractor atan Gallan Sports & Infra Pvt. Ltd thlan an ni.