Player pathum hnawhchhuahna inkhelah Juve leh Inter inhnehtawk phawt

Player pathum hnawhchhuahna inkhelah
Juve leh Inter inhnehtawk phawt
Thawhlehni Coppa Italia semi-final first leg-ah sikhat ve ve thunin Juventus leh an mikhual Inter Milan an inhnehtawk a, Turin khaw inkhelah player pathum hnawhchhuah an ni!
Juve midfielder Juan Cuadrado chuan minute 83-ah mualneitu team hmahruaina goal khungin, hun pekbelh minute kuanaah Cuadrado hi hnawhchhuah a ni!
Hun pekbelh minute ngana a kal mek laiin Inter Milan chuan Gleison Bremer-a handball avangin penalty an hlawhchhuak a, he penalty atanga Inter siphurh sutna goal chhuihluttu Romelu Lukaku chu minute li an khelh leh hnuah hnawhchhuah a ni zui ve leh a; inkhelh banah a agent chuan mihang a nihna zawnah Belgian hi dik lo taka diriam a nih thu a sawichhuak.
On-loan Chelsea forward Lukaku hian tun season kal lai inelna hrang hrangah Inter tan match 20 khel tawhin, goal nga a tilut tling a; hun tawp dawn penalty atanga mikhual team tlawm tur chhanna goal a thun hma leh hnuah Juventus fans lamin Inter Milan striker hi a vun rawng avanga chhaihnawmnah a nih thu a agent-in sawiin, 95th-minute spot-kick a thun hnu hian amah hmusittu home fans hmaah Lukaku hian a goal thun a lawm zui ve ngat a, a tumhnihna atana yellow card hmuin hnawhchhuah a ni zui nghal a, second leg lamah a inlan thei lo ang.
Inkhel tawpna hamrik a rik ruala inbakkaihna chhuak avangin Inter captain Samir Handanovic leh Colombian midfielder Cuadrado pawh red card pek an ni a; team pahnih player-te hi khelmual an chhuahsan laiin tunnel lamah an buai zui leh laih bawk!
Roc Nation Sports International president leh Romelu Lukaku agent ni bawk Michael Yormark chuan Turin khaw inkhela Juventus fans lamin Belgian mihang forward laka chi inthliarna thawm an chhuahkhum thu inkhelh banah sawiin, khati ang huatna leh inthliarna kha engti kawng maha pawmzam theih loh a nih thu a sawilang tel.
Yormark chuan, “Inkhel tawp dawnah penalty atanga Romelu goal khung lai kan thlirliam a, penalty pet hma leh hnu lam thlengin mihang a nihna zawnah mualneitu team tantute’n mawi lo takin an diriam a; tunhma lam pawha a goal khung a lawm tawh thin dan ang thoin a penalty thun a lawm leh a, referee khan yellow card a phawrh khum ta mai a ni.
“Romelu hian Juventus lam atanga thupha chawina dawn a phu a, league thuneitute pawhin Juventus supporter-te khawsak dan kha an dem thuai ka beisei.
“Italian thuneitute’n tun hun hi racism beihletna hun remchangah an hmang tur niin ka ngai a, a tuartu zawk hrem hi an tih loh tawp turah ka ngai,” tiin Lukaku thlavang a hauh.
Nikum nipui thawt laia a club hlui lama loan-a kirleh Lukaku hi San Siro club-a a hun hmasa kum 2019 – 2021 chhung pawh khan chi inthliarna tuartu a lo ni tawh bawk.
Kum 2019 September thla khan a vun han avanga Cagliari fans hmuhsit a lo tawk tawh a, khami tum khan a hnungtawlh zawngin an kal tih a sawichhuak tawh nghe nghe.
Italy rama chi inthliarna lam dotu pawl (anti-discriminatory body) langsar Fare an tiha an hotu lawk ber Piara Powar hoa thil thlen dan an chhuichian hnuah Lukaku thlavang hauh lam aiin Cagliari chu chi inthliarna kalpui kawngah an fihlim hlauh a, Fare thuchhuah chuan Italian football-a ‘racism’ do tulna tur chhan an hmuh loh thu an puang!
September 2021 pawh khan Lukaku bawk hian football-a racism-in hmun a khuar nghehzia sawichhuakin, player-te bakah football thuneitute leh social media lam thlengin tihtur hmabak lian tak an neih thu a sawichhuak.
Kumin January thla mai khan Serie A chuan Napoli fans-in Lukaku laka inthliarna an lantir leh tir loh an chhui a; Belgian mihang an diriam ni vek khan inkhel dangah Lazio supporter-te’n Italian top flight-a mihang player langsar dang Samuel Umtiti leh Lameck Banda of Lecce pawh an vun rawng avangin an lo elsen ve chiah bawk a, a hnu lawkah Lazio chuan thuchhuah siam zui nghalin, an match khelh leh hmasakberah an stadium chhung hmun tenkhat chu luah theih loha an khar tur thu an puang nghe nge.
Nizan semi-final first leg result tarlan hman lohah Cremonese chuan Fiorentina an mikhual a; second leg hi April ni 26 leh 27-ah an khel leh ang.