PM-in Bairabi – Sairang rel kawng a hawng

Prime minister Narendra Modi chuan Inrinni khan lehlangin Mizoram a tlawh a, cheng vaibelchhe 8071 senga siam Bairabi – Sairang rel kawng thar, km. 51.38 a thui a hawng a, Mizorama rel service thar pathum: Aizawl – Delhi Rajdhani Express (Anand Vihar Terminal), Aizawl – Kolkata Express leh Aizawl – Guwahati Express a vailiam nghal. Prime minister chuan khaw chhiat vanga Aizawl a thleng thei lo chu pawi a tih thu sawiin ngaihdam a dil a, a awmhmun atangin Mizoram mipui lawmna boruak chu a tawmpui tih a sawi. Mizoram mipuiin ram zalenna sual a ni emaw India ram a lo din theihna atan a ni emaw hma hruaitu a ni thin, tiin, lalnu Ropuiliani leh pasaltha Khuangchera hming a lam a. “An chet dan kha ram pumin an hlut a, an huaisenna leh an inpekna kha a ropui a. Mizote rilru-ah thu a tuh a, Mizoramin he dinhmun hi a thlen theih phah a ni,” a ti.
Aizawl chu India railway map-ah a lang ve ta tih sawiin, he rel kawng siamna atana a lungphum phumtu a ni thei leh a zawh hnua a hawngtu a ni leh thei chu a lawm hle tih Narendra Modi hian a sawi. “He rel kawng sial hi a hautak em em a, kan engineer leh hnathawktute inpekna ropui tak vanga hlawhtling thei chauh a ni. Sairang – Delhi rel kawng thar hi inkalpawhna a ni satliah loa, kawng tinrenga hmasawnna thar lo thleng tur tana a kulpui a ni. Sumdawng, loneitu, zirlaiten an chhawr hle dawn a, hriselna lamah pawh kan tangkaipui hle ang. Sector hrang hrang – kawngpui, energy, sports leh a dangte pawhin hma a sawnpui dawn a ni,” a ti.
Rel kawng hian mipui tan duhthlan tur tam zawk a siam thei dawn a, a bikin zirna leh damdawia inenkawlnaah rah tha a chhuah dawn tih a sawi a. Hei hian tourism, transport leh hospitality sector-ah hna tam zawk a siam dawn tih a sawi bawk.
“Kan sawrkar hnu ah hmarchhak bial tan hmasawnna hna kan thawk hnem tawh hle a, kan la thawk zel dawn. India hmarchhak leh Asia chhimchhak hi Mizoram kaltlanga thlunzawm kan tum a, Act East Policy hnuaia Kaladan Multi Modal Transit Transport Project leh Sairang to Hmawngbuchhuah rel kawng hmangin NE economic corridor, Bay of Bengal kaltlangin Asia chhimchhak ram kan thlunzawm dawn a ni,” a ti.
Union Railways minister Ashwini Vaishnaw chuan Mizoram a lawmpui tih a sawi a. He project hi a awlsam lo hle a, leiverh 45 leh lei lian 55 a awm a. Khualzin tan awlsamna tam tak a thlen dawn, tiin, cargo service train pawh an service tir nghal dawn a, Mizoram thlai tharchhuah awlsam takin state pawnah an phur chhuak zung zung thei tawh dawn tioh a sawi a ni.
Chief minister Lalduhoma pawhin Prime minister-in a hmuna kala a rawn hawnsak chu Mizoram leh hmarchhak bial tana a inpek zia a tilang tih a sawi a. Rel kawng thar leh rel service tharte hian India ram laili nen inpawhna thuk zawk min siamsak dawn a, sum leh paiah hma kan sawn pui hle dawn tih a sawi a ni. Project thar kalpui tur a rawn hawn tel chu Mizoram mamawh em em, kawng tam taka kan tangkaipui tur an ni tih a sawi a ni.
Chutihrualin, August 2023-a he rel kawng siam laia vanduaina tawka nunna chan ta te an hrereng a, a pawi an la tibang thei loa, an chhungte an tawrhpui takzet tih a sawi.
Prime minister hian cheng vaibelchhe 33 senga sak Residential School Kawrthah (Ministry of Minority Affairs) leh vbch. 24 senga sak Tlangnuam Eklavya Model Residential School (Ministry of Tribal Affairs) a hawng nghal a. Vbch. 500 senna tur Aizawl Western Side Bypass Road (Ministry of DoNER), vbch. 226 senga thawh tur Mualkhanga Gas Bottling Plant (Ministry of Petroleum & Natural Ggas), vbch. 70 senga thawh tur Chhimtuipui (Tuipui Ferry) lei (Ministry of Roads Transport & Highways), vbch. 45 senga thawh tur Thenzawl – Sialsuk kawngpui (via Sathlur & Lau river) (Ministry of DoNER), vbhc.32 senga laih tur Khankawn to Rongura Hmun kawngpui, Serchhip district (Ministry of DoNER) leh vbch. 12 senga thawh tur Khelo Multipurpose Hall, Tuikual Aizawl (Ministry of Youth Affairs & Sports) lungphum a phum bawk.
Ruahman lawk ang chuan Prime minister hi Lengpui Airport atangin Thuampui Helipad-ah helicopter-in a rawn tum anga, Lammual atanga hawng tur a ni a. Ruahsur avangin helicopter hian a thlawk thei loa, Lengpui Airport atang hian inbiak hmuh theihna hmangin a hawng ta a. Lammual atang hian sawrkar hotute leh mipuiin an lo chhim a ni. Sairang leh Bairabi ah pawh inbiak hmuh theihna hmangin sawrkar aiawhte leh mipuiin an lo chhim ve bawk.
Prime minister Narendra Modi hian 2014 November 29 khan he rel kawng sakna tur lungphum hi a lo phum tawh a ni.