Prime Minister Narendra Modi chuan Pathianni khan Parliament building thar a hawng a. PM Modi hian Lok Sabha chamber-ah ‘Sengol’ chu Speaker dinglamah puja tih hnuah a dah nghal bawk a. Sengol hi Adheenams ten Parliament building thar dah hmain PM Modi an hlan a ni.
India chu democractic ram a nih mai piah lamah ‘mother of democracy’ a ni, tiin Modi chuan sawiin parliament building thar chuan self-reliant India ni chhuak mek a pholang tiin a sawi bawk a.
PM Modi hian Parliament building thar hawn hriat rengna puala siam Rs 75 coin a tlangzarh bawk a.
Rajya Sabha Deputy Chairman Harivansh chuan President Droupadi Murmu leh Vice President Jagdeep Dhankhar te message a chhiar chhuak bawk a.
Ceremony hi traditional ‘puja’ hmanga bultan niin Vedic rituals nen hawn hma darkar khat velah tan a ni a. Puja neihnaah hian Lok Sabha speaker Om Birla pawh PM Modi rualin a tel ve bawk.
Parliament building thar hi chhawng li niin a sak nan hian cheng vaibelchhia 970 sen a ni a, he building hi Ahmedabad-a inbun HCP Design, Planning and Management te buatsaih niin Tata Projects Limited te sak a ni thung.
-- Advertisement --
Rahul-a’n sel
Congress leader Rahul Gandhi chuan Parliament chu mipuite aw a ni tia sawiin Prime Minister chuan Parliament building thar hawn chu ‘coronation’ angah a ngai tiin a sawi.
“Parliament hi mipuite aw a ni a. Prime Minister hian Paraliament House hawn hi coronation-ah a ngai thung,” tiin a sawi.
AICC general secretary, Organisation, K.C. Venugopal pawhin, “Parliament building thar lungphum phumnaah kha tih laia President Ramnath Kovind kha enkan a ni a, tunah a hawnnaah President Droupadi Murmu chu sirah hnawlin a awm leh a ni,” a ti a.
“Hei hi upper caste, anti-backward rilru RSS tena an put lantirna niin constitutional office sang ber pawh an zah zo lo. President te sira hnawl luih hi PM Modi-a’n electoral politics a token angah chauha ngaihna leh thil pawimawhah a namnulzia lantirna a ni” tiin Venugopal chuan a sawi.
RJD ten ‘kuang’ ang ti
Rashtriya Janata Dal (RJD) te chuan Parliament building thar chu kuang ang tia sawiin hei hi BJP te chuan an haw hle thung a. RJD te chuan kum 2024 Lok Sabha inthlan hunah BJP te chu Bihar mipuiten kuangah an thawn liam ang, an ti bawk.
Hei hi chhang letin BJP Bihar te chuan kuang thlalak leh Parliament building thar thlalak dah dunin, “Picture hmasa hi in hma lam hun a ni a, a hnuhnung zawk hi India a ni. In hrethiam em?” an ti let ve thung.
BJP spokesperson Shehzad Poonawalla chuan RJD te tweet “tenawm” a tih laiin spokesperson Gaurav Bhatia chuan kuang RJD te ta leh Parliament chu ram ta tiin a sawi ve bawk.
Tharoor inrawlh
Congress leader Shashi Tharoor chuan Sengol chungchanga sorkar leh opposition te inbeihna chu inremna siam theih nia a ngaih thu a sawi a. Sengol hi PM Modi chuan kum 1947-ah British atanga thuneihna inpekchhawn hriatrenga tia sawiin zah a phu a ti a, mahse, tichung chuan Anand Bhawan, Prayagraj a museum-ah dah mai mai a ti.
Congress te thung chuan Lord Mounbatten, C Rajagopalachari leh Jawaharlal Nehru ten Sengol chu British-in India hnena thuneihna a hlanchhawn symbol tih finfiahna document engmah a awm lo an ti thung.
Tharoor chuan, “Ka mimal ngaihdan chuan Sengol chungchangah inhnialna tanfung tha a awm ve ve a. Sorkar hetiang hian tun hma atanga sovereignty leh rule of dharma a entir an ti hi a dik a. Opposition te pawhin Constitution chu mipuite hminga pawm niin India chu Parliament duhdana mipui aiawha kal niin divine right anga thuneihna inhlanchhawn a ni lo an ti pawh a dik a ni,” a ti bawk a.
“An dinna hi inremna awm thei niin a tu emaw zawkin Mounbatten-an Nehru hnenah tiang hi thuneihna hlanchhawn chhinchhiah nan a pe an tih hi hnawl mai se, a chhan chu finfiahna a awm hauh lo,” tiin a sawi bawk.
Tharoor chuan Sengol sceptre chu traditional power leh authority chhinchhiahna tiin Lok Sabha a dah hian monarch hnuaiah ni lo India chu sovereignty a nihna lantirna ti mai ila tiin a sawi bawk.