Champhai district-a ram kang zinga chhiar tum 210 awmah 209 chu lo/huan halna a ni.
-- Advertisement --
Champhai District Fire Prevention Committee chu chairman, district bawrhsap James Lalrinchhana hoin Thawhtanni khan an thukhawm a, February 6-10 chhunga Champhai district-a ‘Kangmei Ven Hapta’ hman dan tur leh kumin thal chhoa district chhunga kangmei a chhuah lohna’na hmalak dan tur an rel.
Report danin, Champhai district-ah kum 2022 chhung khan ram kang tum 210 thlengah ram hectare 3243.08 a kang nia chhut a ni. Ram kang zinga tum 209 (hectare 3205) chu lo/ leipui/ huan kang vang niin, forest area kang tum khat (hectare 38.08) a thleng bawk.
Ram tikangtu tam zawkte hriatchian theih an nih thin loh avangin nikum chhungin ram tikangtu pakhat lakah FIR thehluh a ni a. Nikum vek khan lo hal hun bituk chhunga rokhawlhna avanga hal hman lo khaw pathumten thuneitute hnenah phalna lain an hal a ni.
Committee member secretary, DFO Champhai Lalduhthlana sawi danin, Champhai district chu India rama ram kang thlen tam zualna state 11 hnuaia district 26 zingah a tel a, kangmei ven kawnga hmalakna project cheng vaibelchhe 19 hu, kum 2022- 2023 atanga 2026- 2027 (kum 5) chhunga kalpui tur, Ministry of Environment, Forest & Climate Change leh National Disaster Management Authority pawmpui tura thawn a ni tawh tih a sawi.
Bawrhsap chuan an district-a chhiatna thleng thin zingah lirnghing leh kangmei chhuak avanga chhiatna a thleng tam ber tih sawiin, engemawchena ven lawk theih kangmei laka him tlan nan inzirtirna tha neih a pawimawh tih a sawi a. Thutkhawmah hian kangmei laka fimkhur tura inzirtirna, kangmei ven tangkaina leh kang thelh kawnga hriat tur tulte mipui thleng pha tura puan dan tur sawi a ni.
Kangmei hluar hun chhungin ran vulh mi, sapel thinte leh silai kawlte hnenah kangmei ven leh nungcha humhalh kawnga inzirtir tha tih niin, airgun leh ulhbun inkahsiak huaihawt tha tih a ni. Kangmei ven kawnga thawk tha khua/ veng pathum hnenah lawmman pek nise tih a ni a. Huan, leipui leh lo hal tur ten sawrkarin dan a siam zulzuiin meikawng sial a, kawngpui vat chhuak lo tur leh 2023 March 13 aia tlai loa lo hal hman vek tura hriattir nise an ti bawk.
Kum hnih dana tihchhuah thin India State of Forest Report 2021 tarlan danin, Mizoram pum zau zawng atanga chhuta za zela 0.74 chu ngaw dur chhah tha (very dense forest) a ni a, ngaw dur chhah tha lutuk lo (moderately dense forest) zaa 26.11 a awm a, ram hring chin, forest cover zau zawng chu zaa 84.53 a ni. Undivided Champhai district-ah ngaw dur chhah tha sq.km. 55.36, ngaw dur chhah tha lutuk lo sq.km 942.9 leh ram hring pangngai – open forest sq.km. 1375.63 a zau awma chhut a ni. Undivided Champhai district-a ram hring zau zawng chin chu ram zau zawng atanga chhuta za zela 74.53 a ni. Kum hnih kalta 2019- 2021 chhunga Mizoramin ram hring a hloh zat chu sq. km 185.51a ni a; heng zinga sq.km. 113.90 chu undivided Champhai district chhunga thleng a ni.