PMAY-G dawngtu 20512 atangin in sa zo tawh 6509

Sawrkar laipui ruahmannaa thingtlangmite chenna in neilote in sak tanpuina – Pradhan Mantri Awaas Yojana – Gramin (PMAY-G) hnuaiah Mizoramah tanpuina dawngtu 20512 an awm a, heng mite atang hian 6509 chuan an sa zo tawh.
Larsap Dr Hari Babu Kambhampati chuan Thawhtanni khan Rural Development department hotute a kawm a. Ministry of Rural Development (MoRD) hnuaia thingtlangmite hmasawnna atana hmalakna pawimawhte sawipuiin, PMAY-G leh NMMS hmalakna bik powerpoint hmangin sawifiah a ni.
Department hotute report danin, SECC-2011 hmanga khua leh tuite dinhmun zirchianna khaw tina Gram Sabha-in an endik hnu ah PMAY-G tanpuina dawngtute hi thlan an ni a. He endikna hnuaia tel hman lo, in sak tanpuina mamawhte chu Awaas+ (Additional Deserving Households) hmanga belh leh an ni.
A hmasa zawkah hian chhungkaw 13532 thlan an ni a, an vaiin tanpuina hi an dawng tawh. Chhungkaw 6509 chuan in an sa zo tawh a, sa mek 7023 an awm. Awaas+ hnuaiah kum 2021- 2022 sawrkar kuma target chu chhungkaw 6980 an ni a, an vai hian tanpuina hi pek tawh niin, sa mek vek an ni thung. A pahniha in sak tanpuina pek hi chhungkaw 20512 an ni a, sa zo tawh chu 6509 an ni.
In sak tanpuina la zinga thenkhat hi thawhkhatna leh thawhhnihna la tawh, thawh thumna leh thawh lina lak la mamawhte an ni a. PMAY-G tanpuina hmanga in sakte hi a len zawng metre 20 square atangin metre 25 square-a tihlen a ni.
Larsap chuan PMAY-G scheme hi Prime minister Narendra Modi chuan a ngaipawimawh a. He hmalakna hnuaiah hian kum 2022 a ralhmain chenna in la neilo ten chenna in an nei vek tura ruahman a nih laiin, kum 2024 thlengin pawhsei a ni leh tih a sawi a. Huntiam pawhsei chhung hian thawk zo thei turin tan lehzual a ngai tih a sawi.
PMAY-G hnuaiah MoRD atanga sum lut tur la lut lo awm nual chu a chhan zawn chhuah nise, a tul angin MoRD ah pawh dawr a inhuam tih a sawi a ni.
RD hnathawkte thawhrimna azarah ni za inhlawhna tluang taka kalpui a ni te, hnathawktute hming chhinchhiahna pawh National Mobile Monitoring System (NMMS) app hmang tangkaiin hnathawktu zawng zawng zinga zaa 72 aia tam mah dah luh theih a ni chu lawmawm a tih thu larsap hian a sawi a. MNREGA hnuaia ni za inhlawhnaa thawkte bank account-ah hlawh tha takin, a hun takah thun theih a ni chu lawmawm a tih thu a sawi bawk.
NMMS app hi tunhnaia hman thar a ni a. He app hmang hian MNREGA hnuaia hnathawktute chhinchhiah a ni a, hnathawh leh a thlalakte pawh satellite hmangin endik zung zung theih a ni.