Point 4 in City an sang fal

Inrinni zana English Premier League khelhah champion lai Manchester City chuan Etihad Stadium-a an mikhual Leeds United an hneh a, champion nawn leh thei turin point liin hma an hruai fal. Inkhel dangah Liverpool leh Chelsea in hnehna an chang bawk.
Haaland ni lovin Gundogan
Manchester City an chak tawh chuan English Premier League-ah season khat chhunga goal thun hnem ber record siamtu Haaland hming a lang thuai a. Haaland a goal thun thu sawizui a ni fo thin. Inrinni zana Leeds United an hneh tum hi chuan Haaland goal thun hmuh tur a awm lova, an chakna goal hnih hi captain Ilkay Gundogan thun ve ve a ni thung. Haaland hian goal thun theihna hun tha tak a nei naa Gundogan hi hattrick siam tir ngei a tum vangin penaly a pet duh lo thung.
An hnuai chiaha awm Arsenal lakah point li-a hmahruai fal turin City hian an mualah chak an mamawh a, hnehna chan ngei tumin an inlan. Haaland-a’n hun tha a hlah hnu lawk minute 19-naah Riyad Mahrez siamsak tha tak atangin Gundogan chuan lei hrulhah fuh zetin a pet goal a, hmahruaina goal a thun. Hmahruaina goal an thun hnuin City an khel tha chhunzawm a, goal an thun belh leh thuai. Minute 27-naah Mahrez siamsak atang thoin Gundogan chuan goal hmahruai an thun dan ngai ang deuh chiahin an goal hnihna a thun a, an hmahruaina a tizau. Gundogan goal hnih thun hmangin City hian minute 84 thleng hma an hruai.
Champion lai City lakah si hnih ngawta hnufual Leeds hian hun tawp dawn hnaih minute 85-naah Rodrigo goal hmangin an si phurh an sut then. Etihad Stadium lakah point hlawhchhuah beiseina nei thar mah se hun tawp thlengin goal an thun belh thei tawh lova, City lakah 2-1 in Leeds United hi an tlawm zui ta a ni. Leeds United lakah an chak vangin Pep Guardiola team City champion nawn leh turin hma lam an pan a. An hnuai chiaha awm Arsenal nen inkhelh inzatah point liin City hi an sang fal a, champion turin an dinhmun a tha hle.
Pep a lawm lo
An mualah 2-1 in Leeds United hneh mah se Manchester City manager Pep Guardiola a lawm lo va, penalty pet tura ruat Haaland-a’n a pet lo va, Gundogan-a’n a pet goa leh si lo chu Pep Guardiola lawm loh chhan a ni.
Si hnih faia hmahruai tawh City hian hun tawp dawn hnaihah penalty an hlawhchhuak. Phil Foden penalty hlawhchhuah hi penalty pet tura ruat Erling Haaland chuan pet tur awm takin ball a la a. Pet leh si lovin goal hnih khung tawh Gundogan a pettir. Gundogan hian goal poet pet perin, apet goal leh si lova, hei hian manager Pep hi a ti lawm lo.
Pep Guardiola chuan, “2-0 a hmahruai laia penalty pettu turin a pet lo kha tih loh tawp tur a ni. 4-0 a hmahruai tawh chu ni ila a hriat thiam theih a, EPL-ah chuan 2-0 a hma kan hruai hian chak chiang kan la ni lova, inelna a la tawp vel lo. Haaland hi tunah chuan penalty pet thiam ber a ni”, a ti. Haaland chet ze mawi tak a fak rualin, chiang zawka chak an mamawh lai a nih vangin a thil tih chu hawihawmna chi loh tak, chin zui zel atana duhawm lo a nih thu a sawi tel bawk.
Haaland hian penalty hi pet se, pet goal bawk se Manchester United player ropui Ruud van Nistelrooy record hnaih leh zual sauh tur a ni a. Hnuhma tha dang hnutchhiah belh theihna hun tha a neih chu amah ngeiin a beng per. EPL-ah hian season khatah penalty pet goal hnem ber record siamtu chu vawi kua pet a, pet goal vek Nistelrooy a ni a. Haalaand hian EPL-ah penalty vawi sarih petin a pet goal vek bawk. Goal thun tum ngar ngar a mahni hmasial fal a nih loha hian fak erawh a hlawh hle tho thung.
Liverpool an chak leh ta
Season bul tan tha lo mahse Liverpool chuan a tawp khar that an tum a, season tawp lamah chak an thiam thar. Reds hian Inrinni zan khan Anfield-a an mikhual Brenford chu si khat faiin an hneh.
Table-ah panganaa awm mek Liverpool hian an mikhual Brentford lakah bul an tan tha viau a, minute 13-na lekah Mohamed Salah chuan Virgil van Dijk siamsak tha tak chu awlsam takin a pet goal a, he inkhela goal awmchhun hi a thun. An muala chak Liverpool hian palinaa awm Manchester United an hnaih leh zual a, United an phak lohna hi point khat chauh a ni mek a. Red Devils ai hian khelh hnih ngawtin an khel tam zawk thung.
Brentford laka Liverpool chakna goal thuntu Mahamed Salah khan Reds tan goal 186 a thun tling chiah a, midfielder ropui Steven Gerrard goal thun zat nihrualin, Liverpool tan goal thun hnem zual pangana a nih chiah bawk.
Inkhel dangah Chelsea chuan an manager lai lawk Frank Lampard hnuaiah a vawi khat nan hnehna an chang a. Blues hian Vitality Stadium-a an khingpui AFC Bournemouth chu 3-1 in an hneh. Chelsea tan hian Conor Gallagher (9′) Benoit Badiashile (82′) leh João Félix ten goal khat theuh an thun.