Police kaphlumtu police ban a ni Thi chhungte sawrkar hna pe dawn

March 5 tlaia Vairengte ram Buarchep hmuna Mizoram Armed Police duty pakhatin a police pui pahnih a kahhlum avangin amah hi sawrkarin a ban nghal a, nunna chan police pahnih chhungte hnenah zangnadawmna sumfai bakah sawrkar hna a pe dawn.
Mizoram Inspector General of Police John Neihlaia sawi danin, Assam ramri bul Buarchepa duty 2nd Bn MAP ami Hav. Bimal Kanti Chakma (56) chuan March 5 tlai dar 6:16 khan Barchepa an main camp bul NCO barrack-a a awmpui pahnih chu a silai kawl lai, AK-47 Rifle-in kap a, Hav. J Lalrohlua (51) chu a hmunah thi nghalin Hav. Indra Kumar Rai (53) chu a hliam enkawl a nih hnu, hemi zan dar 7.20 ah Vairengte damdawi inah a hliam tuar loin a thi ve leh a ni.
Hav J Lalrohlua hi choka chhuatah hmuh niin a hnung lam, a lu hnaih lamah silaimu a lut a; Hav. Indra Kumar Rai hi inkahna hmun atanga feet 40 vela hlaah hliam na tak tuara hmuh niin, helai hmuna an awmpui dang Hav Z Biakthara’n Hav. Rai bawihsawm paha a zawhnaah inhnial thinrimna a awm hran loa, Hav. Bimal Kanti Chakma hian thinrimin silaiin a kap ringawt niin a sawi.
Hav. Rai hi a hliam a awmah silaimu a lut a, a malpuiah silaimu hi a chhuak leh a, a tluk hnua kah fuh a nih a rinawm tih Police hotute chuan an sawi.
Hav. Bimal Kanti Chakma hi man nghal a ni a. Thu zawhfiahnaah, a zu in thin chu a havilder puite hian an post commander hnenah an hek thin nia puhin, a thinrimin a kap ta mai niin a sawi. Inkahnaah hian silaimu kahruahna 15 leh a magazine chhunga awm silaimu la kahchhuah loh 13 hmuh a ni a, chhuata thla silaimu pakhat hmuh tel a ni bawk.
IGP John Neihlaia chuan, thiante kaphlumtu Hav. Bimal Kanti Chakma hi dan anga a chungchang rel tur chhuizui theih ni mah se, dan ang bawkin a chunga hremna lek nghal turin Indian Constitition Article 311 hmangin a hna atanga ban (dismiss) nghal a ni tih a sawi a. 2023 March 6 atangin banna hi hman nghal a ni. Court-in a tih angion Kolasib District Jail-a dahluh nghal a ni bawk.
Zawhna chhangin Police hotute chuan, ban a nih danah hian sawrkar hna dang thawk thei a ni tawh loa, sawrkar hnathawk pension pangngaiin hamthatna an dawn ang zawng zawng a dawng thei lo bawk. GP fund a neih chuan, chu erawh a lak theih an ring tih an sawi.
Pawikhawihtu Hav. Bimal Kanti Chakma hi Lunglei district Tipperighat lam mi a ni a, tunah Lunglei Luangmualah a khawsa nia sawi a ni.
Nunna chan Hav. J. Lalrohlua (L), Lawngtlai Chanmari leh Hav. Indra Kumar Rai (L), Lunglei Luangmual te chu ral laka thi ni chiah lo mah se, ramria duty an nih bakah thih dan pangngaia thi an nih loh avangin an chhungte hna pek an dil sak tih IGP hian a sawi a. Home minister leh chief minister-ten rem an tih tawh thu sawiin, Hav Rohlua hi chu a fapa sawrkara lut rual an nei tawh a, Hav Rai hi chu a fapa kum ala tlin loh avangin nghah a la ngai rih dawn tih a sawi. Department-in dan a neih angin a ralna cheng nuai khat an pe anga, Police Welfare lamin nuai 1 ve ve ralna sum an pek tur thu a sawi.
He inkahna avang hian Chakma leh Mizote inkarah buaina awm lo turin a duh thu a sawi bakah sakhuana leh hman bil anga innghirnghona awm lo turin Mizo mipui an ngen tih John Neihlaia hian a sawi a. “He thil thleng hi mimal thil liau liau, zu in thin leh in thin lo tih thu atanga thleng a ni,” a ti.