Polish thlawhnain Russian player phur duh lo! Lufthansa pawhin ticket pechhuak duh lo!

Polish thlawhnain Russian player phur duh lo!
Lufthansa pawhin ticket pechhuak duh lo!
Russian tennis player Vitalia Diatchenko chuan Thawhtanni khan social media lamah thinrim eng phiarin Polish airline pakhat LOT an tihin a phurh duh loh vanga a lungnihloh thu a auchhuahpui a, German airline hmingthang Lufthansa pawhin Russian nu hi ticket an pechhuak duh lo!
Thawhlehni khan an thlawhna panga Polish flag nemkai LOT chuan Russian tennis player puhna hi an nemnghet ve nghal a; he thil thlenna hmun hi Cairo khawpui a ni.
Kum 32 mi Diatchenko chuan, “Airport-ah ka riak ta ringawt a, ka hnam avangin third class citizen ang leka en ka ni a, euro sang tlem ka sen phah bawk,” tiin a ziak.
Russian hian Warsaw leh Nice khua paltlanga Mediterranean tuipuia thliarkar lian palina Corsica hmuna tournament khel tura sawm a nih thu sawiin, Women’s Tennis Association ranking-a 250-na luahtu Diatchenko chuan LOT-in an thlawhnaa chuan an phal loh hnuah Lufthansa dawr leh mah se ticket an pechhuak duh lo a, visa pechhuak thei ram Spain atanga Schengen zone chu lut thei chauh tur a nih thu an hrilh tih a tarlang tel.
Schengen Area an tih chu European ram 27-te huam chin ram sawina niin, he’ng UE ramte hian an mi leh sate chu passport telloa inkalpawhtawn an remti a, ramriah inhungbikna pawh an nei lo.
Polish airline LOT pawhin email kaltlanga thuchhuah siamin, an thlawhnaa Russian player chuantir an remtih loh chhan an sawifiah a, Covid-29 hripuiin khawvel a tuam laia Poland interior ministry lamin khuahkhirhna thuchhuah an lo siam tawh kha Russia-in Ukraine a run avangin kenkawh chhunzawm a nih thu an sawi.
LOT-in an tarlan zel danin, khuahkhirhna dan an kalpui mekah chuan ramri kana inkalpawh leh airport inkalpawhte chu phal loh a nih thu leh Schengen zone pawna awm Russian Federation citizen-te phurh loh a tel tih an tarlang.
Lufthansa lam chuan Russian player puhna chungchangah hian thuchhuah an la siam ve lo.
European Union chuan Russia atanga an huam china thlawhna thlawhluh an khap a, Schengen zone visa pekchhuah chungchangah pawh khuahkirh chin neih an remti a; nikum September thla khan Finland chuan Baltic states an zawm a, Poland pawhin Russian khualzinte tan an ramri an khar bawk.
Baltic states an tih chuan Europe hmarchhak ramte a huam a, chu’ng ramte chu Baltic Sea kam ramho – Estonia, Latvia, leh Lithuania-te an ni.