Politics thila hman tum Congress-in an mawng an hlim – MBJP v/president

Politics thila hman tum Congress-in
an mawng an hlim – MBJP v/president
Manipura buaina chhuak politics hmanruaa hman tum Congress party chuan an mawng an hlim mai mai zawk tih BJP Mizoram vice president R Vanramchhuanga chuan a sawi.
Thawhtannia an party office-a inkhawmah BJP Mizoram vice president chuan Manipur buaina a bulthum hre lo ten BJP leh Pu Modi beih na’na an hmang chu a dik lo hle tih sawiin, “Manipur-ah Congress sawrkar laiin communal violence a thleng fo tawh a, nunna chan an awm nual tawh. Chu’ngte chu Congress thil tih kan ti ngai chuang lo. Chuvangin tuna BJP sawrkarna state a nih vanga party politics atana remchannaa hman tum Congress party hian an mawng an hlim mai a ni,” a ti.
Indira Gandhi thih hnu a Sikh mi tam tak thah an nih laiin Congress thil tiha sawi a nih ngai loh thu te, missionary Graham Staines te pafa halhlum an nihin Congress sawrkarna state ni mah se, Congress thah an tih chuan loh thu te, Mizoramah pawh Bawngkawna biak in vawmchhiat a nihin Congress sawrkar lai a ni chungin, Congress tih chhiatsak an tih bik loh thu te a sawi bawk.
“Tun tum Manipur thil thleng pawh Congress vice president Pu Lalthanzara’n BJP thil tiha a puh ang hi kan pawm dawn a nih chuan, Congress sawrkar laia thil thleng thenkhat kan sawi ho khi, Congress thil tih tihna a ni dawn a, an party hian buaina leh harsatna an tichhuak nasa hle tihna a ni ang,” a ti
Tuna Zohnahthlakten harsatna an tawh na avanga inpumkhatna leh remna leh muanna tithuanawp thei thil chu Mizo mipui kaah chhuak loin, Mizoram chu Zofate inpui a nih anga, kan chhehvel ram atanga buaina kan tawh na chu Pathianin Zohnahthlak ram hrang hrang leh tlang hrang hranga awmten inpumkhatna tha kan neih na tur leh Mizo kan nihnaa inhmangaihna leh inpumkhatna tha a awm theihna’n Mizoram mipui tan tlan a ngai zawk tih R Vanramchhuanga hian a sawi a ni.