Sumin a tleh tir ni lo thli
bing a tleh – K Sapdanga
Tunhnaia inthlan pathumah sumin a tleh tir ni lo thli bing a tleh a, he thli hi a tleh zui zel dawn nge tih hriat a nih loh avangin a tleh tirtu duhzawng ngaihpawimawh a tul tih ZPM working president K Sapdanga chuan a sawi.
Thawhtannia ZPM inkhawmah K Sapdanga chuan ZPM thli a tleh tih chu ZPM mipui chauh ni lo, ZPM duhsaktu leh dodaltute pawhin an pawm vek tih a sawi a. Lunglei Municipal inthlana thli tleh chhan kha RT-PCR khawl bun duh loh vangte, by-pass road siam duh loh vangte, kawngpui chhiat vangte nia rin a ni a. A hnu lawkah chu thli tho chu Zemabawk leh Leitanah a tleh leh a, RT-PCR leh by-pass road awm ve reng reng lohna hmunah pawh na takin a tleh tho tih a sawi.
“Inthlan dawn apiangin politics thli hi a tleh thin a, sum leh therhlo vangtein a ni fo thin. Mahse, Lunglei mipui rilru chhemkaltu thli te, Zemabawk leh Leitana thli bing tleh te kha chu sumin a tlehtir a ni lo tih hrechiangtute chu mipui kan ni,” a ti.
He thli hi a tleh zel dawn nge a tawp dawn tih tumahin an sawi thei loa, ZPM chu inti Kristian bik, inti kohhran bik, inti Pathian thuawih bik leh chu chu chapopui ta viau anga puh an ni reng tih ZPM working president hian a sawi a. “Thli siamtu Pathian lamah rilru dik pu turin theihtawp chhuah ila, rilru hmunkhat puin a duhna lam hawia thli tlehtir thintu duhzawng kan ngaihpawimawh zel a tul,” a ti.
Manipur-a Zohnahthlak unauten buaina an tawh phena thil inphum lian tak nia lang chu Kristiante nekchepa nekral tumna a tel nasa hle in a lang tih ZPM hruaitu hian a sawi a. Kan unaute manganna hriain chief minister hoin Mizoram sawrkarin chhanhimna kawng an zawn chu an thlawp a, party anga tangkaina an neih phawt chuan an inring reng a ni tih sawrkar hnenah an thlen tih a sawi bawk.
Sumin a tleh tir ni lo thli bing a tleh – K Sapdanga
Get real time updates directly on you device, subscribe now.