Power renchemna tur ruahman dawn

awh tihhniamna tura sawrkarin a duan project chu Thawhlehni khan Power minister F Rodingliana’n a hawng.
Kawlphetha renchem leh awmze nei zawka hman tangkai a nih theih nana hmalakna ‘Demand Side Management Project’ hi sawrkar laipui Ministry of Power Bureau of Energy Efficiency (BEE) kaltlanga Mizoram DISCOM – Power & Electricity department leh Green Tree Global Pvt. Ltd hmalakna tur a ni a, kum hnih chhunga power mamawh zaa 10 tala tih hniam tum a ni.
Khawvel ram hrang hrangin an ngaihpawimawh em em, Paris Agreement-a India a e avangin energy renchem tura hmalakna hi kalpui a ni.
Kum 10 chhunga Mizoram power mamawh zat chu a let deuhthaw in a pung tih Power minister hian a sawi a. Kum 2015-ah kan mamawh san lai berin mega watt 97 vel a nih laiin tunah chuan Mw 163 chuang a ni ta a, hetihlai hian kan power siamchhuah a pun si loh avangin ram pawn atangin man to tak taka chawkluh a ngai a, renchem taka power hman a tul tih a sawi.
“Unit khat kan hum hian unit khat power thar chhuak tluk kan ni. Mizoram sawrkarin power-a intodelh turin nasa takin a buaipui mek a, central lamah bawhzui ngaite bawhzui zel a ni a, reiloteah project tha tak tak bul tan a nih thuai theih beisei a ni,” a ti.
Aggregate Technical & Commercial loss avanga energy hloh tam lutuk tih tlem a tul tih minister hian sawiin, thawktute chu hemi kawnga tan la turin a fuih. An hna chu eizawnna maia ngai loa, rawngbawlna leh ram leh khawtlang tana thawk an ni tih inhre reng a, tha thlah loa thawk turin a chah a ni.