President’s Rule-a Manipur dah ngenna MP-in a aupui

President’s Rule-a Manipur
dah ngenna MP-in a aupui
Parliament member kalkhawmte hmaah Mizoram Rajya Sabha MP K Vanlalvena chuan Manipur buaina tihtawpna atan President’s Rule-a dah tul a tih thu a sawi.
Parliament thlasik thutkhawm chu Thawhtanni atang khan tan a ni a. Hemi atana inbuatsaihna, All Parliamentary Leaders chu Pathianni khan an thukhawm. Hetah hian K Vanlalvena chuan Mizoram MP ni chunga Manipur chungchang a sawi leh thin chu member dangte hriatthiamna a ngen tih sawi hmasa in, British lo luh hma atanga Mizo hnahthlak hnam hrang hrang Manipur-a an chen tawh thu leh tunah pawh Mizo hnam peng hrang hrang nuai 6 chuang Manipur-ah an chen mek avanga an harsatna chu sawi chhuak thin a ni tih a sawi.
2023 May atanga tun thlengin pawisawi lo nunna tamtak a luang ral tawh a, Manipur-ah sawrkar laipuiin direct-a hma a lak theihnan President’s Rule-a dah chu hna pawimawh hmasa nia a hriat thu a sawi a ni.
Myanmar leh Bangladesh Chittagong Hill-ah inkahna a la awm reng tih sawiin, raltlan tam tak Mizorama an awm mek zingah naupang enkawl ngai tam tak an awm a; Shillong leh Guwahati-a UNICEF awmte an tangkai phak loh avangin Mizoramah UNICEF office din a nih theihnan hma la turin sawrkar laipui a ngen tih a sawi bawk.
All Parliamentary Leaders thutkhawm hi Union minister of Parliamentary Affairs Kiren Rijiju chuan a kaihruai a, Union Defence minister Rajnat Singh leh Rajya Sabha leader of the House JP Nadda te an tel bawk.