Primary school zirlaibu sem loh chhan minister zawt

Primary school zirlaibu
sem loh chhan minister zawt
Congress Thalai chuan School Education minister hnenah ziakin sawrkar school hnuaia primary school leh middle school zirlaibu la sem mumal loh chhan leh Samagra zirtirtu hlawh lak that loh chhan an zawt.
Zirtawpni khan Congress Thalai Hqrs. hruaitute hian an president Laltawnliana hoin School Education Minister office-ah lehkha an thehlut a. Sawrkar primary school-ten vawiin thlengin zirlaibu an la dawng lo tih thlenin, ‘A dawng tlem azawng awmte pawhin subject hnih khat chauh an la dawng a. Zirlaiten lehkhabu an la dawng lo leh a dawng awmchhunte pawhin subject hnih khat chauh an la dawng hi enge a chhan kan hrethiam lo hle a. Zirlaite hi an zir tur lehkhabu pek nghal ni rawh se,’ a ti.
Samagra hnuaia zirtirtuten tun thlengin hlawh an la la lo nia thlen bawkin, ‘Education kaihhnawih thilah kher chuan sawrkar, a bikin i department hi chu inthlahdah lo turin kan ngen a ni,’ a ti a. Congress Thalai chuan zirlaiten zirlaibu an dawn leh dawn loh hi an ngaihven reng dawn tih an hrilh a ni.