Prime Minsterial Post sawiho a ni lo : Pawar

NCP president Sharad Pawar chuan kar kaltaa Patna-a opposition party inhmuhkhawmna neihah ‘Prime Ministerial post’ sawiho a ni lo tiin a sawi.
Inflation, unemployment te bakah communal forces te hmun thenkhata tihphur tuma beihna chungchang te sawiho a ni, tiin Pawar chuan a sawi a.
Hei bakah hian opposition meeting chu ruling Bharatiya Janata Party tena na taka an sawisel avanga sawiselin, eng vangin nge BJP te an lo hlauhthawn em em tia sawiin Pawar chuan ‘politics lamah an puitling lo’ tiin a sawi bawk.
Kar kalta Zirtawpni khan Patna-ah opposition party meeting neih niin Bihar Chief Minister Nitish Kumar chuan a thleng a, kum 2024 Lok Sabha inthlanah BJP te chu inthuruala beiha paihthlak an tum a ni.
Joint press meeting neih zuiah opposition party te chuan inthlan chu common agenda neiin state-wise strategy siamin an inmillohna te dah thain an hmachhawn ang an ti bawk.
BJP tena Opposition inhmuhkhawm sawi nana “Prime Ministerial post chelh tum 19 kalkhawmna” an tih chungchangah Pawar chuan an sawiselna chu a naupang chhiatthlak a ti a.
“Meeting neihnaah Prime Minister post sawi kan nei lo. Inflation leh unemployment kaihhnawih kan sawi a. Hei bakah hian hmun thenkhata communal forces te tihchak tumna awm te kan sawi a, BJP te hian community te inbakkaih turin a siam a ni,” tiin a sawi bawk.
Sakhua leh hnam anga community te inkara hleilenna kaltir tumna hi society tin tana tha lo vek a ni a, thutlukna pawimawh ber chu chutiang thleng theite thunun dan tur zawk chu a ni, tiin a sawi a.
Pawar chuan Patna-a meeting an neih chungchangah ‘hruaitu intite’ thusawi chu a chhiar thu a sawi a. “Opposition leader ten democracy rama meeting an neih remtihlohna a awm em ni. Tu nge a hming ka hriat zui loh a awm a, meeting a tul lohna a sawi a. A thuziah te ka chhiar hnuah Mumbai ah an meeting tur thu a sawi a. BJP ten meeting an neih theih chuan eng vangin nge kan neih theih loh ang?” tiin Pawar chuan a sawi bawk.