Pro Fight inthlifim chho zel
Pro Fight inthlifim chho zel
LPS Arena, Falkland-a Mizoram Labour Link LPS Pro Fight khelh mek chu boxer an inthlifim chho zel a, Nilaini zanah Lalhriattira’n round thumna tawp dawnah C. Vanlalpeka a hneh a, quarter-final lutin, technical knockout hmangin boxer pasarih dangin he mi zan vek hian an bitum theuh an hneh.
Inhnek hnuhnung ber middleweight-ah Tuithiang boxer Hriata’n a tawp dawnah Luangmual boxer Peka a nawr hneh a, round thumna minute hnih leh second 35-ah technical knockout-a a chak rualin Orient Goldsmith Fighter of the Night lawmman a dawng zui nghal a ni.
LPS Arena, Falkland-ah kum 20 mi Hriata leh Peka a tir atangin inhnehtawk viau mah se Hriata’n a hnek fuh hnem zawk a, round hnuhnung berah fuh taka a dawm hnuah nawrin a taksaah a hnek zawnsak a, chhang let thei loa Peka a talbuai avangin referee Hriata Chhunthang chuan inhnek a titawp a, Tuithiang tlangvalin kum hnih kal ta ang bawkin quarter-final a lut leh ta a ni.
Flyweight-ah inhnek vawi thum awnin, technical knockout vekin Lalhriatzela, PC Lalremruata leh Malsawmdawngzela an chak.
Maubawk boxer Hriatzela’n round hnihnaah tawn hriat nei lo Henry Lalsiamthara (Dawrpui Vengthar) a hneh a; Bilkhawthlir boxer Remruata’n a tir atangin Gagan Jaishi (|huampui) a nawr hneh nghal a, round khatna minute khat leh second 15-ah a chak.
Sihphir tlangval Lalremruata lakah Lungkawlh boxer Dawngzela a tlo zawk a, chau taka an inbeih hnu, round thumna laihawlah Remruata’n harsatna tawkin Dawngzela a chak a ni.
Bantam-ah inhnek vawi hnih awmin, technical knockout ve vein Lalnunpuia leh C. Lalruatfela an chak bawk.
Rangvamual boxer Nunpuia’n Malsawmdawngkima (Bawngkawn) hmachhawnin a tir atangin inhnek a thunun a, round khatna a zawh hnuah nawr betin chiang tak takin a hnek a, round hnihna minute khatah inhnek tihtawp a ni.
Tuirial boxer Ruatfela lakah Lalpekhlua (Bawngkawn Brigade) a vanduai ve thung a, rei an inbeih hmain a mitko vei lam kak atangin thisen a chhuak a, a tawp mai theih loh avangin minute khat leh second 54 chiah an inhnek hman tihin Ruatfela a chak a ni.
Light-ah a vawi hnih nan Vanhne tlangval Israel Thangliana a chak a; thiamna leh kawng hrang hrangah F. Vanlalthazuala (Khawruhlian) awpbetin round khatna laihawlah technical knockout-in a chak.
A tum hnihna’n Churachandpur, Manipur boxer Thangboi a chak bawk a, Lalramdinmawia Ralte (Bawngkawn West) nen round thum inhnek tluan mah se judge pahnihin 30-27, 29-28-in an chaktir a, split decision-in an tlang a ni.
Vanlalhriata (Bawngkawn)chuan round sang zawk a lut bawk a, a hmaa ding tur Lalsiemthar Hmar (Zuangtui Vengsang) a inlan loh avangin inhnek hah loin a chak.
Welter-ah quarterfinal vawi hnih lut tawh Vanzairemmawia’n unanimous decision-in LD Enawsa (Siatlai, Siaha District) a hneh a, round thum an inbeih chhungin a chungnung a, chhiar ngai khawpin Enawsa talbuai mah se tlo takin a ding tluan a, Lungtian boxer Remmawia’n round tin a la vek a ni.
LPS Pro Fight Nilaini zan result
FLYWEIGHT
Lalhriatzela (Maubawk) def Henry Lalsiamthara (Dawrpui Vengthar) = TKO
PC Lalremruata (Bilkhawthlir) def Gagan Jaishi (Thuampui) = TKO
Malsawmdawngzela (Lungkawlh) def Lalremruata (Sihphir)
= Technical Knockout (Round 3, Minute 1:29)
BANTAMWEIGHT
Lalnunpuia (Rangvamual) def Malsawmdawngkima (Bawngkawn) = TKO
C Lalruatfela (Tuirial) def Lalpekhlua (Bawngkawn Brigade) = TKO
LIGHTWEIGHT
Vanlalhriata (Bawngkawn) def Lalsiemthar Hmar (Zuangtui Vengsang) = Walk Over
Israel Thangliana (R Vanhne) def F Vanlalthazuala (Khawruhlian) = TKO
Thangboi (Churachandpur, Manipur) def Lalramdinmawia Ralte (Bawngkawn West)
= Split Decision (30-27, 28-29, 29-28)
WELTERWEIGHT
Vanzairemmawia (Lungtian) def LD Enawsa (Siatlai, Siaha District)
= Unanimous Decision (30-27, 30-26, 30-26)
MIDDLE WEIGHT
Lalhriattira (Tuithiang) def C Vanlalpeka (Luangmual) = TKO (Round 3, Minute 2:35)
Orient Goldsmith Fighter of the Night – Lalhriattira (Tuithiang)
Zanin inhnek turte
Zan 10-na : September 18, 2026 (Zirtawpni) – 8:00 PM : Bout 11
FLYWEIGHT
Lalsawmliana (Bethlehem Vengthlang) v Vincent Khongsai (North Molhai, Manipur)
Rommel Malsawmdawngliana (Lungtian) v Malsawmtluanga (Sunhluchhip)
Jerry Zoramliana Fanai (Zawngin) v Laltlansanga (Rawpui)
BANTAMWEIGHT
Lalrinsanga (Thingsulthliah) v T Lallawmkima (Kolasib Saidan)
Lalruatsanga (Maubawk) v Lallawmawma (Zohmun)
LIGHTWEIGHT
LV Robert Lalengliana (Tuipui Ferry) v Vanlalpekhlua (North Lungpher)
Onminlen (Churachandpur, Manipur) v Malsawma (Bethlehem Vengthlang)
Lalnunkima (Sialhau) v David Malsawmzela (East Lungdar)
WELTERWEIGHT
Gospela (Sesawng) v Lebona G Lalchawiliana (Sunhluchhip)
Lalhlupuia Zote (Bawngkawn West) v Lalpektluanga (Kawlhawk)
MIDDLE WEIGHT
Lalremruata (Bawngkawn) v Seigoulal (Churachandpur, Manipur)