PSG hmahruaina chhah tulh tulh

PSG hmahruaina chhah tulh tulh
Kartawp Inrinni zanah 5-2 ngawta mualneitu Brest sawp lehin Paris St-Germain chuan French Ligue 1 table-ah point 13 zetin anmahni hnaihbertu Olympique Marseille an kalsan ta a, nizan result tarlan hman lohah Marseille hian Olympique Lyonnais an hneh chuan PSG chungchuan fal lutukna hi a phet thla leh hlek thung ang.
Stade Francis-Le Ble khelmuala mipui 15,040 lek pungkhawm hmaah goal hmahruai thawhtu Ousmane Dembele chuan second half tir lama a goal hnih dang tiluh leh nen hat-trick a siam a, a game khelh hnuhnung vawiriat lekah goal 14 tehreng a thun tling!
France forward Dembele hian karliamta Nilaini Champions League match pakhata Stuttgart an hneh tum pawh khan goal thum bawk a lo khung tawh a, Ligue 1 scoring chart-ah hmahruaitu a ni mek.
PSG manager Luis Enrique chuan beIN Sports hnenah kum 27 mi Dembele fakin, a nih tum ang tak ni thei player a nih thu leh tun ang zela goal hmaa inrintawkna a nei chho zel a nih chuan amah han ter pha tur league kal laia an awm loh thu a tarlang tel.
Enrique chuan, “Khawi position atang pawhin goal a thun thei vek a, a lu pawhin a harsat chuang lo a, player danglam leh tha bik a ni,” tiin a fak hlawih hlawih.
Tunthla Europe club competition lian ber play-off round lama Ligue 1 club bawk Brest hmachhawn zui leh tur PSG hian a zawna a vawilina atan French title lak an hnaih leh kuar tawh a, kumin hian an title kawl lai an humhim leh thei a ni chuan kum 13 chhunga an vawi 11 champion-na a ni tehreng tawh ang!
Brittany-a hnehna chang tur erawh kha chuan an thawkrim ve hle a, Brest tan second half lamah Romain del Castillo leh Ludovic Ajorque-te’n mikhual team tan goal hni an khung ve avangin hun tawp dawn hnaiha Goncalo Ramos-a goal hnih tihluh chuan mualneitu team hlauhthawnna a tireh ta chauh a ni!