PUC-in Library Week hmang

Pachhunga University College (PUC) chuan Thawhtanni khan Library Week an hmang a, October 10 thleng a awh ang. Mizoram University vice chancellor Prof. Dibakar Chandra Deka leh MZU finance officer Prof. Vanlalchhawna ten an hmanpui.
PUC Library-ah hian lehkhabu 63287 a awm mek a, nitin mi 437 velin tlawh ziah anga chhut a ni. RFID (Radio-Frequency Identification) technology hmangin lehkhabu hawh leh pekir tur tan a thawktute tibuai loa, khawl hmanga lakchhuah leh pekkir leh theih a ni a; competitive exam atana tangkai tur bik lehkhabu dahkhawmna siam niin, mitdel lehkhabu bik engemawzat dah a ni.
AICS (Academy of Integrated Christian Studies) nen lehkhabu inhawh tawn theih tura thuthlung neih a ni a, e-resources (electronic resources) hrang hrang chhawr tangkai theih a ni bawk.
PUC Library Week chhung hian PUC Seminar Hall-ah Book Fair & Display of Rare Collections neih a ni a. Lehkhabu zuartu hrang hrangin lehkhabu an zawrh bakah MZU Central Library leh Mizoram State Archives-ten lehkhabu leh thuziak hmuh tur awm zen zen lote en theih turin an chhawpchhuak a ni.