Pukpui industry hmunah mi permit hawha inbun an tam

Pukpui industry hmunah mi permit hawha inbun an tam
Integrated Infrustructure Development Centre Pukpui (II DC) Lunglei-ah permit nei lo, a neite ta man chawia hawha industry din an tam a, tuna a kalpuitu lian ber pawh mi permit hawh chawp thoa din a ni.
IIDC Pukpui hi Ningani khan MJA Lunglei chuan an tlawh a. He hmun hi kum 2003-a din niin, Pukpui VC-in kum 99 chhung atan Industry department-ah ram an pe a. Department hian electric leh tui an pe a, industry dintute hian a hranpa in awm man an chawi tawh lo. Industry din duh tan in sak a ni a, kum engemawchen hman tangkai lohin a awm.
Tlemlai deuh atang khan mi 10 chuan helai hmuna awm phalna hi hmu in, permit an nei a, tunah erawh thingzaina – saw mill chu a lian ber a, saw mil dintu mi 6 an awm. An ni hian hnathawktu hnamdang vek tih theih an chawr. Industry dintute hian man chawiin mi permit an hawh a, permit an hawh man erawh a inang lo tih an sawi a ni.
Saw mil bikah hian an thing zai sa hi phai lamah an thawn thin a, tualchhungah chuan an hralh tam vak lo tih an sawi a ni. Pukpui YMA president Zodinsanga sawi danin, thingzaina phaw leh a har tam lutuk hi a manganthlakin Lunglei tuilakna Pialthleng tibawlhhlawhtu tur a nih bakah kangmei lakah pawh a him lo hle tih a sawi a. Awmze nei zawka tihral dan awm se, tih chu khawtlang pawhin an duh dan a ni tih a sawi.
MJA hian tui in tur siamna – Carcade Malsawm Industry pawh tlawhin, a neituten an hnathawh dan phung an lo hrilhfiah. Tunah chuan tui hi a bulhnai lawk ami an pump a, thal khawro hunah chuan hmun hran ami lirtheiin an chawi dawn niin an sawi. An ni hian Mizo nula leh tlangval 10 vel hnathawkah ruaiin, tui uma tui an dah tur hi laboratory-ah mithiamten an endik a. Tunah rih chuan Lunglei khawchhungah chiah an la hralhchhuak a ni.