Purunsen lian leh rit ber

Garen Griffin chuan Harrogate Autumn Flower Show, North Yorkshire-a neihah a purunsen thar lian zet mai a phochhuak ve a, he purunsen hi kg 8.97 a rit niin, Guinness World Record chuan khawvela purunsen rit berah an puang.
Griffin hian huan siamin, a pa tih entawnin thlai a zung lam ei chi chin a uar hle a, kum 13 vel kalta atang khan purunsen chin hi a lo tuipui tawh a, a hobby pakhat a ni. Tunah Guinness World Record siam theihna khawpa purunsen lian a thar ta chu nuam a tih thu sawiin, “Beng thleng thlengin bawp kan khai lo chauh a ni. Ka pa khan purunsen lian tak tak a thar thin a, mahse, record siamna khawpa lian erawh a thar lo. Tunah min boralsan hnuah record siamna khawpa lian purunsen ka thar ta hi min hmuhpui ve se ka ti hle a ni,” a ti.
A hmaa purunsen lian record siamtu chu 2014-a an thar niin, kg 8.5 a rit a ni a, he record hi a rawn khum ta a ni.