Asia champion Qatar chuan head coach thar an nei a, World Cup 2022 thlengtu Qatar hian an head coach thar atan manager tawnhriat ngah Carlos Queiroz an ruat.
-- Advertisement --
Qatar hian Felix Sanchez hmunruak luahtu atana an lak luh kum 69 mi Queiroz hi kum 2026 thleng cham turin contract an ziahpui a. Ram pathum; USA, Canada leh Mexico ten an inthlen tawm tur World Cup 2026 ah Queiroz ho hian inlan ngei an tum ang.
Qatar head coach hian club enkawl kawngah tawnhriat a nghah viau tawh. Premier League club ropui Manchester United ah hian Sir Alex Ferguson-a thlachhang dawltu niin hun a lo hmang tawh a. World Cup 2022 ah khan Iran a kaihruai a. Iran bakah hian South Africa, Colombia, Portugal leh Egypt national team a lo enkawl tawh bawk. Ram hrang panga ngawt a enkawl tawh bakah hian club lar Real Madrid leh Sporting Lisbon a lo enkawl tawh bawk.
Asia champion Qatar hian World Cup 2022 an thleng a, an ramah ngei World Cup hmachhawn mahse Ecuador, Senegal leh Netherlands te an hneh lo vek a, World Cup-ah hnuhma chhe zet mai an hnutchhiah. Chhe taka World Cup an thlahliam hnuin an manager Felix Sanchez an ban a. Iran manager hna kalsan hlim hlawl Queiroz an dawr a, inremna tluantling an nei zui thei ta a ni.