Quarter-final-ah PSG Leh Bayern

Pathianni zan khan Fifa Club World Cup 2025 last 16 khelh chhunzawm a ni a, European club lian Paris St Germain leh Bayern Munich ten hnehna changin quarter-final an lut a. PSG leh Bayern te hian semi-final luh an inchuh zui leh dawn a, an inkhel tur hi inkhel ngaihven hlawh tak a ni ngei ang.

PSG 4-0 Inter Miami
European champion Paris St-Germain chuan Mercedes-Benz Stadium, Atlanta-ah Inelna thlengtu; USA aiawha inlan Inter Miami an hmachhawn. An player hlui Lionel Messi khelhna Inter Miami hi 4-0 ngawtin an sawp a, awlsam taka hnehna changin quarter-final an inhlangkai. PSG hian inelna thlengtute tan rawn hlawh Inter Miami beiseina chu a lo thlawnah an liam tir a, an beiseina mei an chhem mihsak hmiah.
A vawi khat nan UEFA Champions League-a champion PSG hian Inter Miami lakah bul an tan tha viau a, chawlhlawk hmain goal li ngaw an thun hman. PSG tan hian João Neves chuan inkhel tan atanga minute 6-na lekah hmahruaina goal a thun nghal. Team lian zawk leh chak tura rinkai zawk ni chunga goal an thun hmasak vangin PSG an phur a, inrintawkna sang zawk nen an inlan zui theih phah bawk. Phur taka inlan PSG tan goal hmahruai thuntu Joao Neves chuan minute 39-naah an goal hnihna a thun belh zui leh , si hnih faiin hma an hruai ta der.
Si hnih faia hma an hruai hnuin PSG an khel tha chhunzawm a, inhnaihchilh takin goal hnih an thun belh zui leh. PSG lakah goal thun tur khawpa chance tha insiamchhuah hlei thei lo Inter Miami hi goal thun mamawh tak chungin chesual zawkah an tang zui leh a, Tomás Avilés chuan minute 44-naah an lamah ti-goal in PSG goal thumna a thunsak. Si thum fai ngawta an hnufual tawh vangin Inter Miami hi an hnual tak zet tawh. An hnual em em laiin PSG an phur viau thung a, Sakawr patuai ang maiin an lim zek zek reng. Si thum faia hmahruai tawh PSG tan hian Achraf Hakimi chuan minute 45’+3-ah an goal lina a thun belh zui leh a, 4-0 ngawta hmahruai chungin chawlhlawk an hmang zui ta a ni.
’Chawlhlawk hnu lamah Lionel Messi leh a khelhpui ten goal thunin an si phurh sut tum viau mah se Champions League champion PSG lakah goal an thun thei lo tluan. PSG pawhin goal an thun belh thei bik lova, inkhel hmuhnawm tak chu 4-0 in a tawp a, PSG in quarter-final an lut.
PSG lakah 4-0 ngawta an tlawm tum hian PSG player hlui Lionel Messi chu hmuhnawm takin a inlan a. Mimal takin khel tha viau mah se Messi hian PSG laka Iner Miami tlawm tur a chhanhim zo chuang lo thung. Hreh tak chungin PSG lakah an tlawm a, an tualzawlah ngei trophy lian lak an tumna chu sarah a zam ral zo ta a ni. Khawvela football ropui ber ang hiala ngaih Lionel Messi hian World Cup a khel leh dawn em tih a la tichiang thei lova, PSG laka inelna a hmachhawn kha khawvel huapa inelna a hmachhawn hnuhnung ber ni thei dinhmunah a ding. Ballon d’Or vawi riat ngawt dawng tawhtu Messi hian khawvel huap inelna a hmachhawn zui lo a nih chuan football hmuhnawmna a tlakhniam phah ngei a rinawm. Fifa World Cup hi kym 2026-ah khelh tur a ni a. Champion lai Argentina chuan Messi ho ngeia inlan ngei ngei an tum hle rih a. USA, Mexico leh Canada te thlen tur World Cup-ah hian Messi an hruai tel thei ngei dawn em tih erawh a la chiang lo thung.
Bayern Munich 4-2 Flamengo
Pathianni zana inkhel dangah German club lian Bayern Munich chuan Hard Rock Stadium ah Brazil club lian Flamengo an hmachhawn a, inkhel hmuhnawm takah 4-0 a hnehna changin quarter-fial an inhlangkai.
German champion Bayern Munich hian Brazil club Flamengo lakah bul an tan tha viau a, chawlhlawk hmain goal thum ngawt an thun hman. Brazil club lian Flamengo hi Bayern Munich lakah an vanduai a, own-goal vangin goal an chhuah thuai. Inkhel tan atanga minute rukna lekah Erick Pulgar chuan an lamah a ti-goal palh a, Bayern Munich hmahruaina goal a thunsak. Hma takah vannei ang reng taka goal thun vangin Bayern an phur a, goal pawh an thun belh leh thuai. Gial hmahruai an thun atanga minute thum hnu lekah Harry Kane chuan an goal hnihna a thun zui leh zat a, an hmahruaina a tizau.
Hma takah goal hnih chhuah mah se Flamengo an insiam tha a, an khingpuite an nawr let na hle. Flamengo tan hian Gerson chuan minute 33-naah goal thunin an si phurh a sut then. Goal thuna an si phurh an sut then vangin phur viau mah se Flamengto an phur rei lo viau thung. Bayern Munich tan hian Leon Goretzka chuan minute 41-naah an goal thumna a thun zui leh ta mai a, Brazil club lian lakah 3-1 a hmahruai chungin chawlhlawk an hmang zui ta a ni.
Chawlhlawk hnu lamah inkhel a hmuhnawm zui viau a, goal hnih kan hmuh belh leh. Chawlhlawk hnu lamah hian Flamengo in bul an tan tha a, goal thun hmasa zawkah an tang. Flamengo tan hian Chelsea leh Arsenal midfielder hlui Jorginho chuan minute 55-naah penalty atanga goal thunin an si phurh a sut then a, German team lian lakah tlawm pumpelh theih beiseina sang zawk neiin, phur takin an inlan zui.
Flamengo in an si phurh sut zawh ngei tumin tan an khawh a, Bayern in an hmahruaina humhim ngei tumin tan an khawh ve bawk. Bayern tan hian Harry Kane chuan minute 73-naah an goal lina thunin, an hmahruaina tizau a, Flamengo lakah 4-2 in an chak zui ta a ni.