Rae Bareli-ah Rahul Gandhi ding dawn, BJP ten na takin bei zui nghal

Congress-te chuan Rae Bareli seat-ah Rahul Gandhi-an candidate dawn ta a, Amethi-ah erawh Priyanka Gandhi Vadra ni lovin Kishori Lal Sharma an candidate thung ang a. Heng seat hnih te hi May 20 ah inthlang tur an ni.
Sharma hi Gandhi family tana rinawm niin tun hma zawng chuan election management lam buaipui thin a ni.
Rae Bareli hian pawimawhna thuk tak neiin kum 2019 Lok Sabha inthlanah khan Uttar Pradesh-a Congress tena seat an lak awm chhun a ni a, khatah khan Sonia Gandhi chuan BJP candidate Dinesh Pratap Singh chu 1,67,000 vote in a hneh a ni.
Seat chang tur puan a nih hma hian party General Secretary Priyanka Gandhi Vadra chu a ding dawna sawi a ni a. Sharma hia Amethi leh Rae Bareli te hi Gandhi family tan kum 25 a vil tawh thung.
Uttar Pradesh bikah Congress te chuan seat 80 awmah seat 17 an chang a, an thawhpui Samajwadi te chuan a la bang seat 63 an chuh thung.
BJP te chuan Amethi ah hian Union Minister Smriti Irani leh Rae Bareli ah hian Uttar Pradesh MoS Dinesh Pratap Sing chu an dintir leh a, kum 2019 pawh khan an ding tawh tho a ni.
Rahul Gandhi hi Amethi atangin kum 2004, 2009 leh 2014 te khan dingin thlantlin a ni tawh a, kum 2019 khan Union Minister leh BJP leader Smriti Irani lakah a hloh thung a, irani khan 55,000 vote in a hneh a ni. Gandhi family Amthei seat hloh dang awm chhun chu Sanjay Gandhi niin kum 1977 khan Indira Gandhi in Emergency a puan duhlohna turu tak karah a hloh a ni.
Rae Bareli bikah erawh Congress te chuan tum thum an hloh pawh a. Kum 1977 khan socialist leader Raj Narain chuan indira Gandhi a hneh a. BJP hotu Ashok Singh chuan kum 1996 leh 1998 khan chakna a chang bawk. Kum 2004 atang khan party matriarch Sonia Gandhi chuan a la luah ta char char a. Kuminah erawh Lok Sabha seat chuh tawh lovin Rajya Sabha seat a thlang ta zawk a ni.

BJP ten bei zui nghal
Union Home Minister Amit Shah chuan Congress leader Rahul Gandhi chuan Amethi atanga tlanchhiain Rabareli zawk a thlang chungin BJP candidate lakah turu takin a chak lovang a ti nghal.
“Modi chuan tum khat chauh Chandrayaan (mission to moon) kalpui tumin hma la a, a hlawhtling nghal a. Sonia Gandhi chuan a fapa Rahul Baba chu tum sawm hnih dahsan tumin a bei tawh a, a la hlawhchham vek. Tunah pawh a tum sawm hnih pakhat nan Amethi tlanchhiat sanin Raebareli atangin nominiation a file a ni” tiin Shah chuan a sawi.
Prime Minister Narendra Modi pawhin Zirtawpnia West Bengal a rally a neihnaah Rahul Gandhi a nuihsawhna tawngkam hmangin ‘Shezada’ chuan a hlauh em avangin tunah chuan Rae Bareli atangin a chuh zawk dawn ta a ti bawk a.
Congress te chu sakhuana behchhan lovin reservation an kalpui intiamna ziak ngeia pe turin a pht thu a sawi a, mahse, an ngawi reng a ti bawk.
“Congress te hian Dalit leh OBC quota te chu chhuhsakin an ‘jihadi’ vote bank te hnenah pek tumin Constituion thlak an tum a ni” tiin Modi chuan a sawi bawk.