Rafah luhchilh lo turin duh
Israel chuan southern Gaza a Palestinian refugee te awmkhawmna Rafah beih a tum chu khawvel ram hrang hrang ten bei lo turin an nawr nasa hle a.
UK Foreign Secretary David Cameron chuan ‘Gaza mipui zahve vel chen mekna a ni’ tia sawiin Dutch FM Hanke Slot pawhin ‘civilian nunna chan an tam dawn lutuk’ tiin a sawi bawk.
Saudi Arabia pawhin Rafah run a nih chuan a ‘sawhkhawk a nasa lutuk dawn’ tiin a sawi bawk a.
Gaza a Hamas ruler te chuan nunna chan sang tel an awm ngei dawn tiin an sawi bawk a ni.
Israel hian nikum 7 Octobe a Hamas silai keng tena a ram luhchilha mi 1,200 chuang an tihhlum hnuah Gaza chu a run zui ve zui a ni.
Israel runna avang hian Gaza ah mi 27,900 chuangin nunna chan tawhin hliam tuar 67,000 chuang an awm tawh bawk niin Hamas te enkawl health ministry chuan a sawi a.
Gazans tam tak te chu an chenna in an chhuahsan hnuah an simna zawngin Rafah ah hian an tlankhawm a ni.
Karkalta Inrinni khan Israel prime minister Benjamin Netanyahu chuan Rafah khawpui an run hma in civilian te chu insaseng turin a hriattir a.
“Indonaa kan thil tum ber Hamas te nuaichimih chu Rafah a Hamas battalion li lai awm chhutchimih loh chuan chakna a chan theihloh. Rafah a civilian te hian inbeihna hmun tur an chhuahsan a ngai a ni” tiin Netanyahu chuan a sawi a. Prime Minister chuan Hamas tena inkahhai a awm theih nana ruahmanna an siam te chu a hnawl zui bawk.
Aid group te chuan Egypt nena inri Rafah atangin civilian zawng zawng lakchhuah vek ngaihna aawm lo an ti bawk a. Rafah ah hian Palestinian 1.5 million vel an awm anga ngaih niin chung zinga a tam ber te chu puan in kaihchawpah an awm mek a ni.
Social media a post a siamah Cameron chuan Rafah beih tumnaah ngaihthatlohna thuktak a neih thu a sawi a. “Tuna mamawh ber chu inkahhai awmse tanpuina thawnluh leh mitang te chhanchhuah a ni a, chumi hnuah inkahhai a awm hlen theih nana hmalak zui tur a ni” a ti a.
Bruins Slot pawhin Rafah dinhmun chu ngaihmawhawm tia sawi bawkin, “Gaza a mipui tam tak ten chhim lamah indona an tlanchiatsan a. Rafah ang mihring bit lutuknaa inbeihna ahtleng a nih chuan civilian nunna chan an tam dawn lutuk a ni” tiin a sawi bawk.
Karkalta Inrinni khan Israel in Rafah airstrike a kalpui avangin Palestinian panga in nunna an chan niin Palestinian news agency, Wafa chuan a tarlng a. Israel Defense Forces (IDF) te chuan Hamas pahnih an tihlum tiin an sawi bawk a.
Hei bakah hian IDF te chuan relief agency for Palestinian refugees (UNRWA) te school bul lawkah leiverh hmuchhuakin chu leiverh chu UNRWA main headquarter nen a inpawh tiin an sawi a.
UNRWA head Philippe Lazzarini chuan an agency office bul lawkah Hams tunnel a awm tih an hriatloh thu sawiin building pawh thla kalta khan an chhuahsan vek tawh a ni a ti bawk.