Rah tha chhuah lovin US hova Russia-Ukraine inbiakna zo

Rah tha chhuah lovin US hova Russia-Ukraine inbiakna zo
Moscow-in Ukraine a rûn avanga indona chhuak mek titawp tura Russia, Ukraine leh US inbiakna chu rah tha liantham chhuah lovin zawh a ni.
Geneva-a ram pathum aiawhte hi Thawhlehni zan tlai tak thleng neih a nih hnuah Nilainiah erawh darkar hnih awrh chauh neih a ni.
US palai, Steve Witkoff-a chuan inbiakna chuan thu lawmawm a nei lo tih sawiin Russian palai hotu leh Ukrainian Volodymyr Zelensky-a te chuan ‘a harsa hle’ tih an sawi ve bawk.
Inbiakna zawh hnuah hian Kremlin palai, Vladimir Medinsky-a chuan a hranin Ukrainian aiawhte hi darkar khat leh a chanve chuang a kawm leh a, engnge an sawi erawh hriat a ni rih lo.
‘Sipai chungchang bikah’ erawh hmasawnna a awm a, indona mual leh inkahhai viltu tur pawh a tel tih Ukrainian palaite chuan an sawi a. Hetih lai hian inkahhai a awm theih loh chhan ber, ram inneihsak chungchangah erawh inremna a la awm lo va, hei hi Moscow leh Kyiv tanhmun inan lohna ber a ni bawk.
Russia hian Donetsk leh Luhansk region awmna, Donbas khawchhak lam neih vek a tumna a tawlh duh lo va, Ukraine-in an pawm thei bik lo.
Tun tum inbiaknaah rah tha chhuak lo mah se Kremlin palai, Medinsky-a chuan ‘sumdawnna thil ang deuh’ a nih thu leh inbiak lehna pawh ‘a awm thuai dawn’ niin a sawi.
Zelensky-a pawhin indawr chu lehlam lehlam tan chhan a inan loh avangin ‘a awlsam lo’ tih a sawi.
Inbiakna zawh hma lawkin Zelensky-a chuan Russia chu ‘inbiaknain a tawp a thlen lohna turin hma an la’ niin a puh.
Russian leh Ukrainian palaite hi US ruahmannain Februaru thla khan Abu Dhabi-ah an lo indawr tawh a, thla eng emaw zat hnua a vawi khat nan mi tang an inthleng theih phah a. Nilaini khan Zelensky-a chuan inthleng leh thuai a ni dawn tih a sawi bawk.
Trump-a hi a hma khan kum li chhung indona titawp tura hma a laknain awmzia a awm thei lo chu a thin pawh a rim hman hle.
Kum li dawn an indo tawh chhungin Moscow thil phut ber nei lo chuan inremna siam ngawt an tum lo.
Kyiv chuan Russia-in Donbas khawchhak lam neih a tum chu Ukrainian ram hran nihna palzutna a nih thu sawiin Donetsk region-a khawpui leh ramri hrulah vengtu pawh a dah nasa hle.
Ukrainian-te hian Donbas khawchhak hi an pe anih chuan nakin zelah Russia tan an ram beih a remchang lehzual dawn niin an ngai a. Zelensky-a pawhin 1938 Munich Agreement an tih, European thiltitheiten Hitler-a’n Czech ram, Sudetenland an luahtir ang mai a nih dawn thu a sawi.
Thawhlehni khan Zelensky-a hian US chanchinbu, Axios hnenah Donbas ram pek chu Ukrainian-te ngaihdan lak a nih pawhin an hnawl dawn sa tih a sawi.
Inbiaknaa an mutan dang leh chu Zaporizhzhia Nuclear Power Plant chungchang a ni a. Europe-a power plant lian ber hi indona laia awm niin March, 2022 atangin Russian thunun a ni a. Ukraine chuan pe kir turin an phut a, Zelensky-a chuan a hma khan Kyiv chuan American-te nen thunun intawm a ni dawn tih a sawi tawh a, Moscow hian an pawm a rinawm loh.
Geneva-ah hian Britain, France, Germany leh Italy aiawhte pawh telin Ukrainian-te nen an inbe bawk.
Karleh Thawhlehni hi Moscow-in Ukraine a rûn champha kum lina a ni tawh.
Indo chhungin sipai leh civil mi sang tel thi leh hliam awmin Ukraine-ah mi maktaduai tel baihvaiin an awm phah a, ni tin beihna an tawng reng.