Rahul iangin Manipur tlawh turin PM Modi phut

Prime Minister chuan Rahul Gandhi chet lak dan enin zawm ve se buainaa khat Manipur-ah mipuite thawi dam turin kal rawh se tiin Congress te chuan an sawi.
Lok Sabha-a Congress Deputy leader Gaurav Gogoi keh senior leader Ajoy Kumar te chuan Rahul Gandhi chu Manipur-ah zuiin Parliament monsoon session neih hunah sorkar atangin zawhna chhan an beisei ngei tur thu an sawi a.
Hei bakah hian Congress te chuan PM Modi kaihhruaia all-party meeting ngiat bawkin Home Minister Amit Shah hova neihin awmzia engmah a neih loh vang tiin an sawi bawk.
Tun hnaia Manipur State a tlawhna video a tihchhuahah Rahul Gandhi chuan Manipur chuan inthawidamna a awm theih nan remna a mamawh ngawih ngawih a ni tiin a sawi a.
“Ni hnih chhung Manipur state ka tlawhah kan unaute tawrhna ka hmuhin thinlung a tikeh a ni. Remna chu hma lam panna awm chhun a ni a, kan zavaiin kan thawh a ngai a ni,” tiin Rahul Gandhi chuan a sawi.
Hetih lai hian Congress General Secretary Jairam Ramesh chuan Prime Minister chuan India ram tihmingthatu Indian football team te hlawhtlinna lawmthu hrilhna hun a neih laiin Manipur chungchangah chuan a la ngawi zui zel a ti bawk a.
“India aiawhin Manipur mi footballer pathum an awm a, PM Modi ngawi hian a tina a ni” tiin Ramesh chuan a sawi bawk a.
Gogoi pawhin, “Prime Minister hian hun a nei a, mahse, Manipur mipuite a rilruah an awm pha lo,” a ti bawk a.
“Manipur-ah thil a la pangngai lo. Sunna, na leh huatnain community te a la luah mek a ni. Phatsanah an inngai a, Manipur-a inzawmna hrui chat zawm leh tur chuan hun a duh rei dawn a. Congress te chuan inthawidamna kawngah chetlak an duh a ni,” tiin Gogoi chuan a sawi bawk.
Kumar chuan Rahul Gandhi-an Manipur a tlawh chuan awmzia a neih thuk thu sawiin, “Rahul Gandhi tlawhin nghawng a neih a lang a, thil pangngai turin a insingsa tan a ni,” tiin a sawi bawk.
Manipur buaina May 3 atanga intan tawhah tun thlengin remna siamin a la awm thei lo va. Prime Minister Narendra Modi chuan tawngkam khat pawhin Manipur buai chungchangah sawi a la nei lo.