Raltlante’n ration buhfai la tan

Manipur atanga Mizorama tlanchhiate’n Mizoramah ration buhfai an la tan a, Thawhtanni atang khan district hrang hrangah buhfai hi an la.Food, Civil Supplies & Consumer Affairs (FCSSA) department hotute chuan Manipur atanga Mizorama raltlante’n Mizoramah ration buhfai an dawn tan thu leh, thla lehah chuan buhfai inpek pawh a fel lehzual an beisei thu te an sawi.
One Nation, One Ration Card (ONORC) programme hnuaiah raltlante hi ration buhfai pek an ni a, AAY (card eng) te’n kg 35, PHH (card pawl) te’n kg 5 an dawng.
FCSSA department hotute hnen atanga thu dawn danin, Mizoram state-ah ration card nei ni lo mah se an ration card number emaw an adhaar no emaw an neih chuan, kutzungpui nemin buhfai hi an la thei a ni. Ration card number hria hi chu an tam lo a, adhaar card no hria an ni tlangpui.
Manipur atanga Mizorama tlanchhiate hi thla hmasa atanga Mizorama awm an ni a, May thlaah khan FCSSA department hian buhfai pek nghal tum mah se Manipur-ah internet an tihtawp avangin thui an kal thei lo a, hotu sangte leh minister te’n sorkar laipuiah an thlen a, tun kar atangin buhfai a lak theih ta a ni.
FCSSA department hotute chuan buhfai lak tawhna khuate chiang faka sawi theih a nih rih loh thu leh, Mizoram hmun hrang hrangah an la tawh tih a chian thu te an sawi a, raltlante’n buhfai an lak avangin tualchhunga buhfai indaih loh a awm phah loh tur thu an sawi bawk.
Manipur-ah adhaar leh ration card thlun zawm (link) hna a muan avangin, Zo hnahthlak raltlante zingah pawh adhaar leh ration card thlun zawm loh vanga buhfai la thei lo an awm a rinawm thu an sawi tel.