Ram dang leh state dang atangin vawk leh vawksa lam lakluh khap

African Swine Fever (ASF) leng mek laka invenna atan Aizawl district huamchhungah ram dang leh state dang bakah district dang atang pawhin vawk, vawksa leh vawksa atanga thil siam chi eng pawh lakluh khap a ni.
Aizawl district magistrate chuan kumin July 22-a thupek a lo tihchhuah tawh chu tlem her danglamin thupek thar a tichhuak a. Aizawl district chhungah ram dang (foreign) atanga vawk, vawksa leh vawksa atanga siam eitur chi reng reng lakluh khap a ni a. State dang leh district dang atangin vawk, vawksa leh vawksa atanga siam eitur reng reng lakluh khap a ni.
Vawk damlo talh leh hralh khap a ni a. Vawk damlo chu dah hran thuai tur a ni. Vawk thi reng reng, bawlhhlawh paihna hmunah leh lui kawr remchangah paih loh tur a ni a. Vawk thi chu feet 4 tala thuka phum tur a ni. Chumi hnuah chinai kg.2 vel tal phul tur a ni. Vawk in leh a vel pawh disinfect vek tur a ni.
Vawk damlo leh thi an awmin AH & Vety official-te hriattir thuai tur a ni a. Ti lo an awm chuan action lak a ni dawn tih a sawi.
Aizawl district chhung khua leh khua emaw veng leh veng emawa vawk inlakpawh tawn tur reng rengah vawk hrisel tha chauh lak tur a ni a. ‘Infected area’ a puante atangin vawk lakluh leh lak chhuah khap a ni bawk.
Aizawl khawpui chhungah pawh, khua leh khua inkarah leh veng leh veng inkara vawk lakluh reng rengah Disaster Management Act hnuaia ruat bialtu zonal officer-theuh hriattir hmasak tur a ni.
He thupek hi tih danglam a nih loh chuan thla hnih chhung a huam anga, zawm lo te chu Section 223 BNS hmanga hrem an ni dawn tih a sawi.