Ram hruaitu tharte tan MKHC-in tawngtai rawt

Mizoram Kohhran Hruaitute Committee (MKHC) chuan ram hruaitu tharte tan tawngtairual neih a rawt.
MKHC hian Ningani khan Aizawlah general meeting vawi 29-na an nei a. Secretary report leh financial report ngaihthlak a nih hnuin rorel a ni a. MKHC hruaitu (office bearer) tharte pawmna leh executive member tharte pawm a ni. Tul dangte ngaihtuah ho a ni.
2024-2025 MKHC hruaitu tharte chu: chairman – Rev R Vanlalnghaka (Synod moderator), vice chairmen – Rev R Lalrintluanga (BCM) leh Rev Zionvarmawia Fanchun (LIKBK), general secretary – Rev R Lalrinsanga (UPC-NEI), joint secretaries – Upa Lalnilawma Colney (SDA) leh Rev. Lallawmthanga (WMCEI), treasurer – Michael Lalthanmawia (Catholic), finance secretary – Lt. Col. Lalhriatpuia (Salvation Army) an ni.
Thutkhawm hi MKHC chairman kalchhuak tur Rev Dr C Chawnghmingliana’n a kaihruai a, National Tobacco Control Programme-in an dil angin hun pek an ni. NTCP state nodal officer Dr H Lianthangpuia’n vaihlo hlauhawmna chungchanga hriat tur pawimawh sawiin, state consultant R Lalremruata’n presentation a a pe a, vaihlo zuk leh hmuam chungchangah hriat tur hrilhin, MKHC nen engtin nge an thawhho theih ang tih te sawi a ni.

MKHC Executive Committee-in Mizorama kohhran zawng zawngten December 16 (Inrinni) emaw December 17 (Pathianni) emaw, mahni kohhran remchan hun zawk zawkah ram pum huap tawngtai neih ni se tiin a rel a. Tawngtai thupui chu:
4Ram roreltu MLA thlanna tluang tak leh boruak muanawm taka neih avang leh vote chhiar hun atana December 3 (Pathianni) ECI-in a ruat, Kristian-te niserh tibuai loa hun danga sawn leh tura ECI leh Pathian hnena dilna tihhlawhtlin a nih avanga lawmthu sawi.
4Ram hruaituten Pathian duh dana tha tak leh dik taka Mizoram tana ro an rel theih nan tawngtai.
4Krismas leh kumthar tluang tak leh muanawm taka hman theih nan.