Ram pum huap intihsiakah Mizoram SLDC pakhatna

Ram pum huap intihsiakah
Mizoram SLDC pakhatna
India ram pum huap intihsiakna, Grid India leh Forum of Load Despatcher (FOLD) in a buatsaih, ‘Emerging LDC’ category-ah 4th LDC Excellence Awards 2024 chu Power & Electricity department hnuaia Mizoram State Load Despatch Centre (SLDC) in a la.
Lawmman hlanna hi 23rd National Power System Conference IIT Indore-ah neih a ni a. P&E department aiawhin engineer -in- chief H Zonunsanga chuan Central Electricity Authority (CEA) chairman Ghan Shyam Prasad hnen atangin a dawng.
Intihsiaknaah hian India ram pum hi category thuma then niin, Emerging LDC category (state leh UT 13 awmna) ah pakhatna – 4th LDC Excellence Award 2024 hi Mizoram SLDC hnena hlan a ni. Kum 2023 khan top 3-ah a lang tawh a ni.
State tina Load Despatch Centre-ten power source an neih an hman tangkai dan, power market an hman tangkai dan, state capital tana islanding scheme an ruahman dan, grid stability maintain-na atana Automatic Demand Management System (ADMS) leh Under Frequency Relays (UFR) an hman dan, cyber security atana invenhimna an neih leh thawktute hmasawn zelna atana training an bawhzui dan hmanga intihsiak a ni. Heng bakah hian interview leh presentation hmanga intihsiak a ni bawk.
Power & Electricity minister F Rodingliana chuan he lawmman dawn a nih theihna tura rim taka thawktu zawng zawng chungah lawmthu a sawi a. Ram leh hnam tan theihtawp chhuah chhunzawm zel turin duhsakna a hlan a ni.