Ram pumah fai beihpui thlak dawn

India ram pumah September 17 atanga October 17 chhung hian fai beihpui thlakin kawng hrang hrangin hun hman a ni dawn a. Mizoramah pawh hman tur niin, Ningani khan district tinah khuhhawn a ni.

A hmanna pui ber Aizawlah chuan UD&PA leh PHE department tangdun huaihawta hman a ni a. Hmanpuitu UD&PA minister K Sapdanga chuan, kan fai loh em avanga he hun hi hmang tur kan ni loa, kan fai tawh lawman a ni pah tih a sawi. Zirlaite chu an nu leh pa, pi leh pute faina kawnga kaihruaitu ni turin a chah a. Faina kawnga beihpui thlakna tha ber chu Zo nun mawi – tlawmngaihna nena suihzawm a ni, tiin, Swachh Bharat Mission (U) hmalakna, ‘segregation at source’ mahni in ngei atanga bawlhhlawh thliarhran hi zawm ngei turin mipui a chah.
Hmanpuitu dang PHE minister Prof. Lalnilawma chuan, fai leh thianghlim turin kan inzirtir rei ta hle a, thuawihlo kan tam tihna nia ah a ngaih theih rualin, hma erawh kan sawn a, tang sauh sauh tura inzirtirnaa ngaih tur chi a ni ang, tiin a sawi. Bawlhhlawh leh leivung kan paih duhdah avanga a tuar nasa ber chu PHE department a ni, tiin, tui nu leh thianghlim lo avangin tui an pump theih loh phah fo tih a sawi a. An department changin an tuar loa, tui an pek mipuiin an tuar tel tih a sawi a ni. Faina chu midang tih tura dah loin, mahni atanga bul tan a ngai tih a sawi bawk.
Swachhata hi Seva 2026 hi September 17 atanga October 17 chhunga hman tur a ni a. Hemi hun chhung hian, India ram pum huapin fai leh thianghlim kawngah beihpui thlak a ni ang. Mizorama district khawpui tin bakah notified town leh thingtlang khua zawng zawngah faina beihpui thlakna liantham tak neih a ni dawn a. Campaign chhung hian zirna in, bazar hmun, tuikhur, mipui punkhawmna hmun, vengchhung leh mahni in bul bakah zun in leh ek in tihfai beihpui thlak a ni ang.
SHS 2026 pual hian zirna inah faina hnatlang bakah faina lam hawi intihsiakna leh inhrilhriatna hun hman a ni dawn a. Faina kawnga hma latu sanitation worker-te chawimawina leh health check-up buatsaih a ni bawk ang.
October 1 hian “Ek Din, Ek Ghanta, Ek Saath” ni khat, darkar inang, kan zavaiin, tiin faina hnatlangpui neih tur a ni a. Mizorama chuan chief minister hoin zing dar 8-9 inkarah neih tum niin, mahni chenna leh hnathawhna hmun theuh tihfai runpui neih tura ruahman a ni.